Cloudburst hits Ramban village: کشمیر میں قدرت کا قہر،رامبن میں بادل پھٹنے سے بھاری تباہی،3لوگوں کی موت،100سے زائد رہائشی مکانات منہدم

جموں و کشمیر کے رامبن کے دھرم کنڈ میں اتوار کی صبح اچانک سیلاب آگیا جس سے پورے علاقے میں خوف و ہراس پھیل گیا۔ اس اچانک سیلاب میں تین افراد کی موت ہو گئی ہے جبکہ ایک شخص لاپتہ ہو گیا ہے اور کئی مکانات کو نقصان پہنچا ہے۔ اس کے علاوہ کئی لوگ گھروں میں پھنسے ہوئے ہیں، انہیں بچانے کے لیے ریسکیو آپریشن جاری ہے۔ بتایا جا رہا ہے کہ تیز بارش کی وجہ سے نالے میں پانی بڑھ گیا اور اچانک سیلاب آ گیا۔ یہ پانی چناب پل کے قریب گاؤں دھرم کنڈ میں داخل ہو گیا۔ گاؤں میں پانی داخل ہونے سے پورے علاقے میں خوف وبے چینی کا عالم ہے۔موصولہ اطلاعات کے مطابق سیلابی پانی گاؤں میں داخل ہونے سے 100 مکانات مکمل طور پر تباہ ہو گئے ہیں جب کہ 25 سے 30 گھروں کو جزوی نقصان پہنچا ہے۔

اطلاعات کے مطابق علاقے میں پانی داخل ہونے سے کئی لوگ گھروں میں پھنس گئے ہیں، جنہیں بچانے کے لیے ریسکیو آپریشن جاری ہے۔ ریسکیو ٹیم نے اب تک 90 سے 100 افراد کو علاقے سے بحفاظت نکال لیا ہے۔دریں اثناء ضلع رامبن کے ڈپٹی کمشنر نے خراب موسم کے پیش نظر لوگوں کو محتاط رہنے کا مشورہ دیا ہے۔ ڈپٹی کمشنر ایکس پر پوسٹ شیئر کرتے ہوئے لکھا، رامبن ضلع میں خراب موسم اور شدید بارش کے پیش نظر لوگوں کو الرٹ رہنے اور حفاظتی تدابیر پر عمل کرنے کا مشورہ دیا جاتا ہے۔ کسی بھی ہنگامی صورتحال کے لیے، آپ ڈسٹرکٹ کنٹرول روم سے 01998-295500، 01998-266790 پر رابطہ کر سکتے ہیں۔ باخبر رہیں، محفوظ رہیں!

ادھربی جے پی لیڈر اور ایم پی جتیندر سنگھ نے کہا کہ جموں و کشمیر کے رامبن ضلع میں رامبن قصبے کے آس پاس کے علاقوں میں رات بھر تیز بارش، لینڈ سلائیڈنگ اور تیز ہوائیں چلیں۔ قومی شاہراہ بند ہے اور بدقسمتی سے 3 افراد ہلاک اور کچھ خاندانوں کی املاک کو نقصان پہنچا ہے۔بی جے پی لیڈر نے کہا، ‘میں ڈپٹی کمشنر بصیر الحق چودھری کے ساتھ مسلسل رابطے میں ہوں۔ ضلعی انتظامیہ اپنی بروقت اور فوری کارروائی پر تعریف کی مستحق ہے جس سے کئی قیمتی جانیں بچانے میں مدد ملی۔ مالی اور دیگر تمام قسم کا ریلیف دیا جا رہا ہے۔انہوں نے عوام سے اپیل کرتے ہوئے کہا کہ لوگ گھبرائیں نہیں، ہم مل کر اس قدرتی آفت پر قابو پالیں گے۔ ڈی سی کو بتایا گیا ہے کہ ضرورت پڑنے پر رکن پارلیمنٹ کے ذاتی وسائل سے بھی مددفراہم کی جاسکتی ہے۔

بھارت ایکسپریس۔