INSV Kaundinya Sets Sail on Maiden Voyage: قدیم طرز کا بحری جہاز ’کونڈِنّیہ‘ اپنی پہلی سمندری یاترا پر روانہ، وزیر اعظم مودی نے خوشی کا اظہار کیا

نئی دہلی: بھارتی بحریہ کا خصوصی جہاز آئی این ایس وی کونڈِنّیہ، جو لکڑی اور جوٹ سے تیار کیا گیا ہے، پیر کے روز گجرات سے عمان کے لیے روانہ ہو گیا۔ وزیر اعظم نریندر مودی نے آئی این ایس وی کونڈِنّیہ کی پہلی سمندری یاترا پر خوشی کا اظہار کیا ہے۔ انہوں نے سوشل میڈیا پلیٹ فارم ایکس پر ایک پوسٹ میں کہا کہ یہ دیکھ کر بے حد خوشی ہوئی کہ آئی این ایس وی کونڈِنّیہ پوربندر سے عمان کے مسقط کے لیے اپنی پہلی سمندری سفر پر روانہ ہو رہا ہے۔

وزیر اعظم مودی نے کہا کہ قدیم بھارتی اسٹچڈ پلینک ٹیکنالوجی (سلائی شدہ تختوں کی تکنیک) سے تیار کیا گیا یہ جہاز بھارت کی بھرپور سمندری روایات کی عکاسی کرتا ہے۔ انہوں نے اس منفرد جہاز کو حقیقت کا روپ دینے والے ڈیزائنرز، کاریگروں، جہاز سازوں اور بھارتی بحریہ کی انتھک محنت کو سراہتے ہوئے انہیں دل سے مبارکباد دی۔ انہوں نے کہا کہ جہاز کے عملے کے لیے میری نیک خواہشات ہیں، ان کا یہ سفر محفوظ اور یادگار ہو، کیونکہ وہ خلیجی خطے اور اس سے آگے ہمارے تاریخی تعلقات کو ازسرِنو زندہ کر رہے ہیں۔

اس بحری جہاز کی سب سے بڑی خاصیت یہ ہے کہ اسے قدیم بادبانی طریقے سے تیار کیا گیا ہے۔ یہ جہاز علامتی طور پر ان تاریخی سمندری راستوں کا ازسرِنو جائزہ لے گا جنہوں نے ہزاروں برسوں سے بھارت کو وسیع تر بحرِ ہند کی دنیا سے جوڑے رکھا ہے۔ اس سفر کے ذریعے یہ جہاز بھارت کی قدیم جہاز سازی اور سمندری روایات کو دوبارہ زندہ کرے گا۔

یہ جہاز قدیم بھارتی جہازوں کی تصویری جھلکیوں سے متاثر ہو کر مکمل طور پر روایتی سلائی شدہ تختوں کی تکنیک کے ذریعے تیار کیا گیا ہے۔ وزارتِ دفاع کے مطابق، آئی این ایس وی کونڈِنّیہ تاریخ، دستکاری اور جدید بحری مہارت کا ایک نایاب امتزاج ہے۔ جدید جہازوں کے برعکس، اس کے لکڑی کے تختوں کو ناریل کے ریشے سے بنی رسی سے سیا گیا ہے اور قدرتی رال سے بند کیا گیا ہے۔ یہ بھارت کے ساحلی علاقوں اور بحرِ ہند میں قدیم زمانے میں رائج جہاز سازی کی روایت کی نمائندگی کرتا ہے۔

اس تکنیک نے بھارتی ملاحوں کو جدید نیویگیشن اور دھات کاری کی ایجاد سے بہت پہلے مغربی ایشیا، افریقہ اور جنوب مشرقی ایشیا تک طویل سمندری سفر کرنے کے قابل بنایا تھا۔ اس منصوبے کا آغاز مرکزی وزارتِ ثقافت، بھارتی بحریہ اور ہوڈی انوویشنز کے درمیان ایک سہ فریقی معاہدے کے تحت کیا گیا تھا۔ یہ بھارت کی جانب سے مقامی علمی نظاموں کو دوبارہ دریافت کرنے اور انہیں ازسرِنو تخلیق کرنے کی کوششوں کا ایک اہم حصہ ہے۔ یہ جہاز ماسٹر شپ رائٹ بابو شنکرن کی نگرانی میں روایتی کاریگروں نے تیار کیا ہے۔

بھارت ایکسپریس۔