AIMPLB calls for ‘dialogue’ between India and Pakistan: ہندوستان پاکستان جنگ پر مسلم پرسنل لابورڈ کا بڑا بیان،جنگ کے بجائے بات چیت کا کیا مطالبہ

ہندوستان اور پاکستان کے درمیان جاری جنگ کے بیچ مسلم پرسنل لا بورڈ نے امن کی گہار لگائی ہے۔آل انڈیا مسلم پرسنل لا بورڈ (اے آئی ایم پی ایل بی) نے بھارت اور پاکستان سے مطالبہ کیا کہ وہ جاری تنازعہ کو بات چیت کے ذریعے حل کریں اوریہ بھی  کہا کہ دو ایٹمی طاقتیں “جنگ کی متحمل نہیں ہو سکتیں”۔

جمعرات کو اپنے عہدیداروں کے ایک خصوصی آن لائن اجلاس میں، آپریشن سندور کے ایک دن بعد، اے آئی ایم پی ایل بی نے بھارت-پاکستان سرحد پر بڑھتی ہوئی کشیدگی پر “شدید تشویش” کا اظہار کرتے ہوئے ایک قرارداد منظور کی۔بورڈ نے کہا کہ وہ “قوم اور اس کے عوام کے دفاع اور تحفظ کے لیے اٹھائے گئے ہر ضروری قدم کی حمایت کرتا ہے اور “عوام، سیاسی جماعتوں، مسلح افواج اور حکومت” کو اس موقع پر ایک ساتھ آنا چاہیے۔

 بورڈ نے کہا کہ دہشت گردی اور معصوم شہریوں کا قتل ایک سنگین تشویش ہے۔ اسلامی تعلیمات، عالمی طور پر تسلیم شدہ اصولوں اور انسانی اقدار میں دہشت گردی کے لیے کوئی جگہ نہیں ہے۔ لہٰذا، ممالک کو اپنے معاملات دوطرفہ بات چیت اور مذاکرات کے ذریعے حل کرنے چاہئے۔ جنگ کسی بھی مسئلے کا حل نہیں ہے۔ خاص طور پر ایٹمی ہتھیاروں کی موجودگی میں، بھارت اور پاکستان جنگ کی متحمل نہیں ہو سکتے۔اے آئی ایم پی ایل بی نے کہا کہ دونوں ممالک کے درمیان تنازعہ “دونوں قوموں کے عوام کو ناقابلِ برداشت مشکلات اور تکالیف میں ڈبو سکتا ہے”۔

بھارت ایکسپریس۔