Vagdhara Samman Samaroh 2026: واگدھارا سمان سماروہ میں بھارت ایکسپریس کے سی ایم ڈی اپیندر رائے کا خطاب، مثبت سوچ، ثقافت اور اخلاقی اقدار کی اہمیت پر دیا زور

ممبئی: ادب، ثقافت اور سماجی شعبوں سے وابستہ ممتاز شخصیات نے ’واگدھارا سمان سماروہ 2026‘ کے پلیٹ فارم پر شرکت کی۔ بھارت ایکسپریس کے چیئرمین، منیجنگ ڈائریکٹر اور ایڈیٹر اِن چیف اپیندر رائے اس تقریب میں بطور مہمانِ خصوصی شریک ہوئے۔ تقریب سے خطاب کرتے ہوئے انہوں نے زندگی، سماج اور صحافت کے باہمی تعلق پر نہایت گہرائی سے روشنی ڈالی۔ انہوں نے حاضرین سے خطاب کرتے ہوئے کہا کہ آج کے جدید اور ڈیجیٹل دور میں، جب معلومات کا سیلاب آیا ہوا ہے، مثبت سوچ اور معاشرے کی فلاح سے جڑے معاملات کی اہمیت پہلے سے کہیں زیادہ بڑھ گئی ہے۔

انہوں نے واگدھارا ادارے کی بھرپور ستائش کی، جو مسلسل ادب اور ثقافت کی خدمت میں مصروف ہے۔ ان کا کہنا تھا کہ معاشرے کے گمنام ہیروز اور اپنے اپنے شعبوں میں نمایاں مقام حاصل کرنے والی شخصیات کو اعزاز سے نوازنا صرف ان کی خدمات کا اعتراف نہیں، بلکہ آنے والی نسلوں کے لیے حوصلہ افزائی اور رہنمائی کا چراغ روشن کرنے کے مترادف ہے۔

 

मुंबई में आयोजित ‘वाग्धारा सम्मान समारोह 2026’ में अपने विचार साझा किए। #VagdharaSamman #VagdharaSammanSamaroh2026 pic.twitter.com/0SGYuFBsEP

— Upendrra Rai (@UpendrraRai) July 4, 2026

اپیندر رائے نے کہا کہ زندگی میں حالات جیسے بھی ہوں، انسان کی مثبت سوچ اور اخلاقی اقدار ہی معاشرے کی صحیح رہنمائی کرتی ہیں۔ جب تک ہم اپنی جڑوں، اپنی زبان اور اپنی ثقافت سے وابستہ رہیں گے، تب تک ملک کی ترقی کا سفر مضبوطی کے ساتھ جاری رہے گا۔ انہوں نے اپنی تقریر کے دوران یہ اشعار بھی سنائے، ’’ہزار برق گرے، لاکھ آندھیاں اٹھیں، وہ پھول کھل کے رہیں گے جو کھلنے والے ہیں۔‘‘

ان اشعار کی تشریح کرتے ہوئے انہوں نے کہا کہ وقت ہمیشہ ایک جیسا نہیں رہتا۔ زندگی میں کتنی ہی مشکلات، آزمائشیں یا رکاوٹیں کیوں نہ آئیں، اگر کسی انسان کے اندر مثبت سوچ، عزم اور دیانت داری موجود ہو تو دنیا کی کوئی طاقت اسے آگے بڑھنے اور کامیاب ہونے سے نہیں روک سکتی۔ فطرت کا یہی اٹل اصول ہے کہ جو پھول کھلنے کے لیے پیدا ہوئے ہیں، وہ ہر نامساعد حالات کا مقابلہ کرکے بھی ضرور کھلتے ہیں۔ انہوں نے شاعرانہ انداز میں کہا، ’’غم کی شام کتنی ہی طویل کیوں نہ ہ،  اس کا ڈھلنا اور ایک نئی صبح کا آنا طے ہے، اس لیے کبھی ناامید نہیں ہونا چاہیے۔‘‘

تقریب میں کن شخصیات کو اعزاز سے نوازا گیا؟

واگدھارا سمان سماروہ 2026 میں ملک اور معاشرے کے مختلف شعبوں میں نمایاں خدمات انجام دینے والی متعدد ممتاز شخصیات شریک ہوئیں۔ تقریب میں فن، ادب، سیاست اور انتظامیہ سے وابستہ کئی اہم شخصیات کو ان کی نمایاں خدمات کے اعتراف میں اعزازات سے نوازا گیا۔ تلنگانہ کے گورنر شیو پرتاپ شکلا نے تقریب میں باوقار شرکت کی اور حاضرین سے خطاب بھی کیا۔ ممبئی کے شری سدھی ونائک مندر ٹرسٹ کے خزانچی آچاریہ پون ترپاٹھی کو سماجی اور سیاسی شعبوں میں بہتر ہم آہنگی پیدا کرنے پر اعزاز دیا گیا۔ بالی ووڈ کے سینئر اداکار رضا مراد کو فلمی دنیا اور فن کے شعبے میں پانچ دہائیوں سے زائد عرصے پر محیط غیر معمولی خدمات کے اعتراف میں سمان سے نوازا گیا۔

گجیندر چوہان (جنہوں نے ٹی وی سیریل مہابھارت میں یودھشٹر کا کردار ادا کیا تھا) اور معروف اداکار سچن کھیڈیکر، جنہوں نے فلم نیتا جی سبھاش چندر بوس: دی فارگاٹن ہیرو میں مرکزی کردار نبھایا تھا، بھی اسٹیج پر موجود رہے۔ اس کے علاوہ مختلف شعبوں سے تعلق رکھنے والی کئی دیگر ممتاز شخصیات کو بھی ان کی نمایاں خدمات پر واگدھارا کے پلیٹ فارم سے اعزازات سے نوازا گیا۔ واگدھارا سمان سماروہ نہ صرف مختلف شعبوں کی ممتاز شخصیات کے اعزاز کا موقع بنا، بلکہ اس نے ملک کے دانشور طبقے کو ایک ہی پلیٹ فارم پر جمع کرکے یہ پیغام بھی دیا کہ جب تک سچائی، حوصلہ اور خدمتِ خلق کا جذبہ زندہ ہے، معاشرے میں مثبت تبدیلی کی ہوا اسی طرح چلتی رہے گی۔

تقریب کی جھلکیاں

بھارت ایکسپریس۔