Adani Group to Investment in Telangana: اڈانی گروپ کا تلنگانہ میں 48 میگاواٹ اے آئی گرین ڈیٹا سینٹر قائم کرنے کا اعلان، 2,500 کروڑ روپے کی ہوگی سرمایہ کاری

حیدرآباد: اڈانی گروپ نے پیر کو اعلان کیا کہ وہ تلنگانہ میں 48 میگاواٹ کا جدید اے آئی گرین ڈیٹا سینٹر قائم کر رہا ہے، جس پر 2,500 کروڑ روپے کی لاگت آئے گی۔ یہ اعلان اڈانی پورٹس اینڈ اسپیشل اکنامک زون لمیٹڈ کے منیجنگ ڈائریکٹر کرن اڈانی نے تلنگانہ رائزنگ گلوبل سمٹ کے افتتاحی اجلاس سے خطاب کرتے ہوئے کیا۔ کرن اڈانی نے کہا کہ ڈیجیٹل انفراسٹرکچر کے شعبے میں یہ منصوبہ نہ صرف کلاؤڈ کمپیوٹنگ اور ہائی پرفارمنس ٹیکنالوجی کے لئے اہم ہوگا بلکہ تیزی سے ڈیجیٹل ہوتی ہوئی بھارت کی ضروریات پوری کرنے میں بھی کلیدی کردار ادا کرے گا۔

ریاست میں اب تک کی سرمایہ کاری اور ترقیاتی منصوبے

کرن اڈانی کے مطابق اڈانی گروپ نے تلنگانہ میں گزشتہ چند برسوں میں مختلف شعبوں، بالخصوص انفراسٹرکچر اور مینوفیکچرنگ میں اب تک 10,000 کروڑ روپے کی سرمایہ کاری کی ہے۔ ان کا کہنا تھا کہ اسٹیک ہولڈرز کی اشتراکیت اور سہولت نے تلنگانہ کو سرمایہ کاری کے لیے ایک اہم مرکز بنایا ہے۔ انہوں نے بتایا کہ ریاست میں گروپ کے انفراسٹرکچر منصوبوں سے تقریباً 7,000 افراد کو روزگار ملا ہے، جبکہ صرف سڑکوں کے انفراسٹرکچر میں 4,000 کروڑ روپے کی سرمایہ کاری کے ذریعے 100 کلومیٹر سے زائد ہائی ویز تعمیر کیے گئے ہیں جو مانچریال، سوریہ پیٹ، کوڈاد اور کھمم جیسے اضلاع کو جوڑتے ہیں۔

ڈیفنس اور ایرواسپیس مینوفیکچرنگ میں نمایاں کردار

کرن اڈانی نے مزید کہا کہ آتم نربھر بھارت کے وژن کے تحت گروپ نے حیدرآباد میں دفاعی اور فضائی تحقیق و سازوسامان کا ایک بڑا پارک بھی قائم کیا ہے، جہاں یو اے وی (ڈرون ٹیکنالوجی) تیار کی جا رہی ہے۔ یہ مصنوعات نہ صرف بھارتی مسلح افواج بلکہ بین الاقوامی مارکیٹ کو بھی فراہم کی جا رہی ہیں۔ اس صنعتی مرکز میں 1,500 نوجوان کام کر رہے ہیں۔

بھارت ایکسپریس اردو۔