Thyroid Cancer: نئی ریسرچ سے ہوا انکشاف، ان بچوں میں زیادہ ہوتا ہے تھائرائڈ کینسر کا خطرہ

نیویارک، 19 اپریل (آئی این ایس)۔ امریکہ کی ییل یونیورسٹی کے ریسرچرز نے بتایا ہے کہ اگر چھوٹے بچے زندگی کے ابتدائی مرحلے میں بہت باریک دھول کے ذرات (PM 2.5) اور رات کے وقت مصنوعی بیرونی روشنی (O-ALAN) پر مشتمل آلودگی کے رابطے آتے ہیں تو انہیں تھائرائڈ کینسر ہونے کا خطرہ بڑھ سکتا ہے۔

یہ ریسرچ ‘Environmental Health Perspectives’ نامی جریدے میں شائع ہوئی ہے۔ ریسرچ کے مطابق رات کے وقت ہوا میں موجود چھوٹے ذرات اور باہر کی مصنوعی روشنی سے 19 سال تک کے بچوں اور نوجوانوں میں پیپلیری تھائیرائیڈ کینسر کا خطرہ بڑھ سکتا ہے۔

یہ خطرہ خاص طور پر اس وقت بڑھ جاتا ہے جب ان بچوں کو حمل کے دوران یا پیدائش کے پہلے سال کے اندر ان چیزوں کا سامنا کرنا پڑتا ہے۔ اس وقت کو ’پیرینیٹل اسٹیج‘ کہا جاتا ہے۔

ییل اسکول آف پبلک ہیلتھ میں ماحولیاتی صحت کے ماہر ڈاکٹر نکول ڈیزیل نے کہا کہ یہ تشویشناک بات ہے کیونکہ یہ دونوں چیزیں آج کل خاص طور پر شہروں میں بہت عام ہو چکی ہیں۔

اس تحقیق میں کیلیفورنیا کے 736 بچوں اور نوعمروں کے ڈیٹا لیے، جنہیں 20 سال کی عمر سے پہلے پیپلیری تھائرائڈ کینسر ہوا تھا اور ان کا موازنہ 36,800 لوگوں سے کیا گیا جنہیں یہ بیماری نہیں تھی۔

مصنوعی سیاروں اور نقشوں کا استعمال کرتے ہوئے، ریسرچرز نے ان علاقوں کی جانچ کی جہاں بچے پیدائش کے وقت رہتے تھے، اور وہاں آلودگی اور رات کی روشنی کی سطح کا جائزہ لیا۔ اسٹڈی کے تمام شرکاء کا تعلق کیلیفورنیا سے تھا۔

نتائج سے معلوم ہوا کہ اگر ہوا میں باریک ذرات (PM2.5) کی مقدار 10 مائیکرو گرام فی مکعب میٹر (cubic meter) بڑھ جائے تو تھائرائیڈ کینسر کا خطرہ 7 فیصد تک بڑھ سکتا ہے۔

یہ اثر نوعمروں (15-19 سال) اور ہسپانوی بچوں میں سب سے زیادہ دیکھا گیا۔ اس کے ساتھ ساتھ جو بچے ایسے علاقوں میں پیدا ہوئے جہاں رات کے وقت مصنوعی روشنی زیادہ ہوتی ہے ان میں تھائرائیڈ کینسر ہونے کے امکانات 23 سے 25 فیصد زیادہ پائے گئے۔

ڈاکٹر ڈیزیل نے کہا کہ بچوں اور نوعمروں میں تھائرائیڈ کینسر تیزی سے بڑھ رہا ہے لیکن ابھی تک ہم اس کی وجوہات کے بارے میں زیادہ نہیں جانتے ہیں۔ یہ اسٹڈی یہ ظاہر کرنے کی پہلی بڑی کوشش ہے کہ زندگی کے شروع میں آلودگی اور رات کی روشنی کی نمائش اس بیماری کا سبب بن سکتی ہے۔ حالانکہ، ریسرچرز نے یہ بھی کہا کہ اس نتیجے کو یقینی طور پر ماننے سے پہلے مزید تحقیق کی ضرورت ہے۔

بھارت ایکسپریس۔