Champions Trophy 2025: چیمپئنز ٹرافی کے حوالے سے وسیم اکرم کا بڑا دعویٰ، کہا- پاکستان کا دورہ ضرور کرے گا ہندوستان

نئی دہلی: پاکستان کے سابق کپتان وسیم اکرم کو امید ہے کہ ہندوستان اگلے سال آئی سی سی چیمپئنز ٹرافی کے لیے پاکستان کا دورہ کرے گا اور وہ اسے کرکٹ کے لیے اچھی بات سمجھتے ہیں۔ بورڈ آف کنٹرول فار کرکٹ ان انڈیا (بی سی سی آئی) نے ابھی تک نہ تو اس بات سے انکار کیا ہے اور نہ ہی اس کی تصدیق کی ہے کہ ہندوستانی ٹیم ٹورنامنٹ کے لیے پاکستان جائے گی۔ بی سی سی آئی نے بارہا کہا ہے کہ وہ مرکزی حکومت کی ہدایات پر عمل کریں گے۔

ESPNcricinfo نے اکرم کے حوالے سے کہا، ’’میں جو کچھ پڑھ رہا ہوں اس سے ہندوستانی حکومت اور بی سی سی آئی کی طرف سے مثبت اشارے مل رہے ہیں۔ میں نے یہ بھی پڑھا ہے کہ وہ شاید اپنے سھی میچ لاہور میں کھیلیں گے۔ ممکنہ طور پر وہ لاہور آئیں گے اور اسی رات واپس چلے جائیں گے، میں اس کے لیے پوری طرح تیار ہوں، بشرطیکہ ہندوستان کو کوئی دقت نہ ہو۔

انہوں نے کہا، ’’میں آپ سے وعدہ کر سکتا ہوں کہ ان کی بہت اچھی طرح دیکھ بھال کی جائے گی۔ میرا مطلب ہے کہ وراٹ کوہلی، روہت شرما، ہاردک پانڈیا، سوریہ کمار یادو جیسے ہندوستانی کرکٹرز کے پاکستان میں مداح ہیں۔ نوجوان کرکٹ شائقین انہیں پسند کرتے ہیں۔‘‘

پاکستان کرکٹ بورڈ (پی سی بی) 19 فروری سے 9 مارچ تک پاکستان میں 2025 کی چیمپئنز ٹرافی کی میزبانی کے لیے پرعزم ہے۔ اس نے رسد اور سیکورٹی انتظامات کو آسان بنانے کے لیے ہندوستان کے تمام میچوں کی میزبانی ہندوستانی سرحد کے قریب واقع شہر لاہور میں کرنے کی تجویز پیش کی ہے۔

اس کے علاوہ، پی سی بی اپنی ٹیم کو سپورٹ کرنے کے خواہشمند ہندوستانی شائقین کے لیے تقریباً 17,000 ویزے جاری کرنے کا منصوبہ بنا رہا ہے۔ فائنل کے ساتھ ساتھ ہندوستان کا سیمی فائنل بھی لاہور میں ہی ہو گا، اگر وہ کوالیفائی کرتا ہے تو۔

عظیم تیز گیندباز نے دعویٰ کیا کہ ہندوستان کا پاکستان دورہ نہ صرف پاکستان کے لیے بلکہ کرکٹ کی دنیا کے لیے بھی بڑی بات ہو گی۔ اکرم نے کہا، ’’آج کے دور میں لوگوں کا آپس میں رابطہ بہت ضروری ہے، سوشل میڈیا کے اس دور میں دنیا بھر میں بہت زیادہ منفی باتیں ہوتی ہیں، مجھے لگتا ہے کہ اگر انڈیا آتا ہے تو یہ کرکٹ کے لیے بہت اچھا ہو گا اور یقیناً یہ پاکستان کے لیے بھی بہت اچھا ہو گا۔‘‘

بتا دیں کہ2008 کے ممبئی دہشت گردانہ حملوں کے بعد سے ہندوستان نے پاکستان میں کوئی بین الاقوامی میچ نہیں کھیلا ہے۔ ہندوستان گزشتہ سال ایشیا کپ کے لیے پاکستان نہیں گیا تھا اور اس کے میچ سری لنکا میں کھیلے گئے تھے۔ حالانکہ، پاکستان نے 2023 کے ون ڈے ورلڈ کپ میں کھیلنے کے لیے ہندوستان کا دورہ کیا تھا اور ٹورنامنٹ سے جلد باہر ہو گیا۔

چیمپئنز ٹرافی میں آٹھ ٹیمیں حصہ لیں گی – افغانستان، آسٹریلیا، بنگلہ دیش، انگلینڈ، ہندوستان، نیوزی لینڈ، پاکستان اور جنوبی افریقہ، جو چار چار کے دو گروپس میں مدمقابل ہوں گی، اس کے بعد سیمی فائنل اور ایک فائنل ہوگا۔

بھارت ایکسپریس۔