Ellyse Perry WPL 2026: ایلس پیری اور اینابیل سدرلینڈ ڈبلیو پی ایل 2026سے ہوئیں  باہر، دہلی کیپٹلز کے لیے بھی بری خبر

ویمنز پریمیئر لیگ 2026 سے قبل رائل چیلنجرز بنگلور اور دہلی کیپٹلز کو بڑا دھچکا لگا ہے۔ آسٹریلیا کی دو نامور آل راؤنڈر کھلاڑیوں، ایلس پیری اور اینابیل سدرلینڈ نے ذاتی وجوہات کا حوالہ دیتے ہوئے آئندہ سیزن میں نہ کھیلنے کا فیصلہ کیا ہے۔ ان کے اس فیصلے نے دونوں فرنچائزز کی تیاریوں کو متاثر کر دیا ہے۔ایلس پیری کے ڈبلیو پی ایل سے دستبردار ہونے کے بعد رائل چیلنجرز بنگلور نے ان کی جگہ سیالی ستگھرے کو اسکواڈ میں شامل کیا ہے۔ سیالی کو آر سی بی کی جانب سے 30 لاکھ روپے ملیں گے، جو نیلامی میں ان کی بنیادی قیمت تھی۔ دوسری جانب دہلی کیپٹلز نے اینابیل سدرلینڈ کے متبادل کے طور پر آسٹریلوی لیگ اسپنر الیانا کنگ کو ٹیم میں شامل کرنے کا اعلان کیا ہے، جنہیں ڈبلیو پی ایل 2026 کے لیے 60 لاکھ روپے دیے جائیں گے۔

ایلس پیری اور اینابیل سدرلینڈ کا باہر ہونا دونوں ٹیموں کے لیے بڑا نقصان سمجھا جا رہا ہے، کیونکہ یہ دونوں دنیا کی صفِ اول کی آل راؤنڈر کھلاڑیوں میں شمار ہوتی ہیں۔ ایلس پیری ڈبلیو پی ایل کی تاریخ میں آر سی بی کے لیے سب سے زیادہ رنز بنانے والی بلے باز ہیں۔ انہوں نے اب تک 64.80 کی شاندار اوسط سے 972 رنز بنائے ہیں، جبکہ گیندبازی میں 14 وکٹیں بھی حاصل کی ہیں۔ سال 2024 میں آر سی بی کو ڈبلیو پی ایل چیمپئن بنانے میں ان کا کردار نہایت اہم رہا تھا۔

اینابیل سدرلینڈ کی بات کریں تو انہوں نے گزشتہ سیزن میں دہلی کیپٹلز کے لیے 9 وکٹیں حاصل کی تھیں۔ موجودہ دور میں انہیں خاص طور پر وائٹ بال کرکٹ کی ایک ابھرتی ہوئی اسٹار کے طور پر دیکھا جا رہا ہے، اس لیے ان کا ٹیم سے باہر ہونا دہلی کے لیے تشویش کا باعث بنا ہے۔

ادھر یوپی واریئرز کے اسکواڈ میں بھی بڑی تبدیلی دیکھنے کو ملی ہے۔ ٹیم کی بائیں ہاتھ کی تیز گیندباز ٹاٹا نوریس کا انتخاب 2026 ویمنز ٹی20 ورلڈ کپ کوالیفائر کے لیے امریکہ کی ٹیم میں ہو گیا ہے۔ ان کی جگہ یوپی واریئرز نے آسٹریلوی آل راؤنڈر چارلی ناٹ کو شامل کیا ہے۔ واضح رہے کہ ورلڈ کپ کوالیفائر نیپال میں 18 جنوری سے یکم فروری تک کھیلا جائے گا۔

بھارت ایکسپریس اردو