PM Modi Meets Indian Cricket Team: دعالمی چیمپئن ہندوستانی کرکٹ ٹیم سے وزیر اعظم کی ملاقات، بہت خوش نظر آئے پی ایم نریندرمودی

دہلی: T20 ورلڈ کپ جیتنے کے بعد بارباڈوس سے دہلی واپس آئی ہندوستانی کرکٹ ٹیم نے جمعرات (4 جولائی، 2024) کے روز وزیر اعظم نریندر مودی سے ملاقات کی۔ اس کی ویڈیو منظر عام پر آگئی ہے۔ ویڈیو میں دیکھا جا سکتا ہے کہ کپتان روہت شرما، بلے باز وراٹ کوہلی، آل راؤنڈر ہاردک پانڈیا، سوریہ کمار یادو اور رشبھ پنت اور کوچ راہل ڈریوڈ سمیت تمام 15 کھلاڑیوں نے پی ایم مودی سے ان کی رہائش گاہ پر ملاقات کی۔

ہندوستانی کرکٹ ٹیم سے بات کرتے ہوئے وزیر اعظم مودی بہت خوش نظر آ رہے ہیں۔ اس دوران پی ایم مودی نے ورلڈ کپ کی ٹرافی بھی اپنے ہاتھ میں لی ہے۔ دراصل وزیر اعظم مودی نے ہندوستانی ٹیم کو ناشتے پر مدعو کیا تھا۔ بتا دیں کہ وزیر اعظم نے گزشتہ ہفتہ کے روز فائنل کے بعد فون پر ہندوستانی ٹیم کو ورلڈ کپ کی مبارکباد دی تھی۔

 

پی ایم مودی سے ملاقات کے بعد، ٹیم ممبئی کے لیے روانہ ہوگی، جہاں بی سی سی آئی نے نریمن پوائنٹ سے وانکھیڑے تک 1 کلومیٹر کی فتح پریڈ کا انتظام کیا ہے، تاکہ شائقین ورلڈ کپ ٹرافی کے ساتھ اپنے ستاروں کی قریبی جھلک دیکھ سکیں۔ اس کے بعد فاتح ٹیم کو وانکھیڑے اسٹیڈیم میں انعام و اکرام سے بھی نوازا جائے گا۔

بتا دیں کہ ہندوستانی ٹیم جمعرات کے روز علی الصبح اندرا گاندھی بین الاقوامی ہوائی اڈے پہنچی۔ روہت شرما کی قیادت والی ٹیم نے ہفتہ کے روز کنسنگٹن اوول میں سنسنی خیز فائنل میں جنوبی افریقہ کو سات رنز سے شکست دے کر دوسری بار ٹی ٹوئنٹی ورلڈ کپ جیت لیا۔ لیکن سمندری طوفان بیرل کی وجہ سے ان کی وطن واپسی میں تاخیر ہوئی۔

بی سی سی آئی نے ٹیم کے لیے ایک خصوصی چارٹرڈ ایئر انڈیا پرواز کا انتظام کیا۔ نیو یارک، نیو جرسی سے بوئنگ 777 کی پرواز بدھ کی صبح برج ٹاؤن کے گرانٹلے ایڈمز انٹرنیشنل ایئرپورٹ پر پہنچی۔ اس کے بعد خصوصی پرواز برج ٹاؤن سے مقامی وقت کے مطابق صبح 4:50 بجے روانہ ہوئی، جس میں ہندوستانی ٹیم کے معاون عملے، کھلاڑیوں کے اہل خانہ، بی سی سی آئی کے عہدیداروں اور 22 سفر کرنے والے میڈیا افراد شامل تھے۔

نئی دہلی پہنچنے کے بعد ٹی ٹوئنٹی ورلڈ کپ کی فاتح ٹیم آئی ٹی سی موریا ہوٹل پہنچی جہاں ان کا پرتپاک استقبال کیا گیا۔

بھارت ایکسپریس۔