Indian Premier League 2026: چنئی سپر کنگسز کی شاندار جیت، آٹھویں نمبر پرممبئی انڈینز 4 پوائنٹس کے ساتھ، کمبوج کے سرپر سجی پرپل کیپ

 نئی دہلی: انڈین پریمیئر لیگ2026 کے سنسنی خیز مقابلوں میں ایک اور بڑی خبر سامنے آئی ہے، جہاں چنئی سپر کنگسز نے ممبئی انڈینز کو کافی بڑے مارجن سے شکست دے کر پوائنٹس ٹیبل میں اہم چھلانگ لگا دی۔ وانکھیڑے اسٹیڈیم میں کھیلے گئے اس میچ میں سی ایس کے نے 103 رنز سے تاریخی کامیابی حاصل کی، جو رنز کے اعتبار سے فرنچائز کی سب سے بڑی جیت قرار دی جا رہی ہے، جبکہ ممبئی انڈینز کی یہ سب سے بڑی شکست بن گئی۔اس میچ کے ہیرو سنجو سیمسن رہے، جنہوں نے شاندار بیٹنگ کا مظاہرہ کرتے ہوئے 54 گیندوں پر ناقابلِ شکست 101 رنز بنائے۔ یہ ان کا اس سیزن کا دوسرا سنچری تھا، جس کی بدولت سی ایس کے نے ایک مضبوط اسکور کھڑا کیا اور پھر بولنگ میں بھی زبردست کارکردگی دکھاتے ہوئے حریف ٹیم کو مکمل طور پر دباؤ میں رکھا۔

اس جیت کے بعد پوائنٹس ٹیبل میں دلچسپ صورتحال پیدا ہو گئی ہے۔ پنجاب کنگز 6 میچز میں 11 پوائنٹس کے ساتھ پہلے نمبر پر برقرار ہے، جب کہ راجستھان رائلز 7 میچز میں 10 پوائنٹس کے ساتھ دوسرے نمبر پر ہے۔ رائل چیلنجرز بنگلورو 6 میچز میں 8 پوائنٹس کے ساتھ تیسرے، اور سن رائزرز حیدرآباد 7 میچز میں 8 پوائنٹس کے ساتھ چوتھے نمبر پر موجود ہے۔ سی ایس کے 7 میچز میں 6 پوائنٹس حاصل کر کے پانچویں پوزیشن پر پہنچ گئی ہے۔ دیگر ٹیموں کی بات کریں تو دہلی کیپیٹلز 6 پوائنٹس کے ساتھ چھٹے نمبر پر ہے، جبکہ گجرات ٹائٹنز بھی اتنے ہی پوائنٹس کے ساتھ ساتویں نمبر پر ہے۔ ممبئی انڈینز 4 پوائنٹس کے ساتھ آٹھویں، لکھنؤ سپر جائنٹس نویں، اور کولکاتا نائٹ رائیڈرز 3 پوائنٹس کے ساتھ آخری نمبر پر موجود ہے۔ برابر پوائنٹس کے باوجود کئی ٹیموں کی پوزیشن نیٹ رن ریٹ کی بنیاد پر مختلف ہے۔

بیٹنگ کے شعبے میں سنچری کے بعد سنجو سیمسن اب سیزن کے ٹاپ رن اسکوررز میں تیسرے نمبر پر آ گئے ہیں۔ انہوں نے 7 میچز میں مجموعی طور پر 293 رنز بنا لیے ہیں۔ اورنج کیپ اب بھی ابھیشیک شرم کے پاس ہے، جو سن رائزرز حیدرآباد کی جانب سے کھیلتے ہوئے 7 اننگز میں 323 رنز بنا چکے ہیں۔ بولنگ میں انشول کمبوج نے ایک بار پھر سبقت حاصل کرتے ہوئے پرپل کیپ اپنے نام کر لی ہے۔ انہوں نے 7 میچز میں 14 وکٹیں حاصل کی ہیں۔ ان کے قریب ترین حریف پرنس یادو ہیں، جو 13 وکٹوں کے ساتھ دوسرے نمبر پر موجود ہیں۔مجموعی طور پر یہ مقابلہ نہ صرف سی ایس کے کے لیے تاریخی ثابت ہوا بلکہ آئی پی ایل 2026 کی پوائنٹس ٹیبل کو بھی مزید دلچسپ بنا گیا ہے، جہاں ہر میچ کے ساتھ ٹیموں کی پوزیشن تبدیل ہوتی دکھائی دے رہی ہے۔

بھارت ایکسپریس اردو