PM Modi Takes a Boat Ride on the Hooghly River: وزیر اعظم نریندر مودی نے کی ہُگلی ندی کی سیر، عوام اور ملاحوں سے کی ملاقات

کولکتہ: وزیر اعظم نریندر مودی نے مغربی بنگال میں انتخابی مہم کے دوران جمعہ کے روز کولکتہ میں ہُگلی ندی کے کنارے وقت گزارا اور گنگا ندی کے تئیں اپنی عقیدت کا اظہار کیا۔ انہوں نے کہا کہ ہر بنگالی کے لیے گنگا کی خاص اہمیت ہے اور یہ ندی بنگال کی روح میں بستا ہے۔

گنگا سے عقیدت کا اظہار

وزیر اعظم نے سوشل میڈیا پلیٹ فارم ’ایکس‘ پر تصاویر شیئر کرتے ہوئے لکھا کہ ہر بنگالی کے لیے گنگا ایک خصوصی مقام رکھتی ہے۔ انہوں نے کہا کہ گنگا کا پوترا پانی ایک مکمل تہذیب کی دائمی روح کو اپنے اندر سموئے ہوئے ہے۔ انہوں نے مزید لکھا کہ آج صبح کولکتہ میں انہوں نے ہُگلی ندی کے کنارے کچھ وقت گزارا، جو ماں گنگا کے تئیں شکرگزاری ظاہر کرنے کا ایک موقع تھا۔

عوام اور ملاحوں سے ملاقات

اس دوران انہوں نے ہُگلی کے کنارے موجود ملاحوں اور صبح کی سیر کرنے والے افراد سے بھی ملاقات کی۔ اپنی پوسٹ میں انہوں نے لکھا کہ انہیں کشتی چلانے والوں سے ملنے کا موقع ملا، جن کی محنت قابلِ تعریف ہے۔ اس کے ساتھ ہی انہوں نے صبح کے وقت چہل قدمی کرنے والے لوگوں سے بھی بات چیت کی اور مغربی بنگال کی ترقی اور بنگالی عوام کی خوشحالی کے لیے کام کرنے کے عزم کا اعادہ کیا۔

دریا کے مناظر اور فوٹوگرافی

ہُگلی ندی کے دورے کے دوران وزیر اعظم مودی ہاتھ میں کیمرہ لیے نظر آئے۔ انہوں نے ندی کے کنارے سے تصاویر بھی لیں اور لوگوں سے ملاقات کرتے ہوئے دکھائی دیے۔ اس موقع پر انہوں نے کنارے پر موجود لوگوں کے سلام اور خیرمقدم کا جواب بھی دیا۔

پلوں کا نظارہ اور تصاویر

انہوں نے اپنی ایک اور پوسٹ میں بتایا کہ انہوں نے ندی کی خوبصورتی کو کیمرے میں قید کرنے کی کوشش کی اور ساتھ ہی ودیا ساگر سیٹو اور ہاوڑہ برج کا قریب سے نظارہ بھی کیا، جو کولکتہ کی شناخت سمجھے جاتے ہیں۔

آئندہ انتخابی ریلیاں

واضح رہے کہ وزیر اعظم نریندر مودی جمعہ کے روز مغربی بنگال کے دم دم اور جادوپور میں انتخابی جلسوں سے خطاب کریں گے۔ وہ صبح تقریباً 11:30 بجے دم دم پہنچیں گے جہاں ایک بڑی ریلی سے خطاب کریں گے، جس کے بعد دوپہر 1 بجے جادوپور میں دوسری ریلی منعقد ہوگی۔

بھارت ایکسپریس۔