World Malaria Day 2026: عالمی یوم ملیریا: “اب ہم کر سکتے ہیں، اب ہمیں کرنا ہی ہوگا” — ملیریا کے خاتمے کا عزم

ہر سال 25 اپریل کو منایا جانے والا عالمی یوم ملیریا اس بار محض آگاہی تک محدود نہیں بلکہ ایک فیصلہ کن موڑ کی علامت بن چکا ہے۔ دہائیوں سے جاری ملیریا کے خلاف جنگ اب ایسے مرحلے میں داخل ہو چکی ہے جہاں سائنس، حکمت عملی اور عالمی عزم ایک ساتھ کھڑے نظر آتے ہیں۔ تیز رفتار سائنسی ترقی نے پہلی بار یہ امید پیدا کی ہے کہ ہماری ہی زندگی میں ملیریا کا مکمل خاتمہ ممکن ہو سکتا ہے۔نئے ویکسین، مؤثر علاج، جدید کنٹرول آلات اور مچھروں کی جینیاتی تبدیلی جیسی جدید ٹیکنالوجیز اس سمت میں نمایاں کردار ادا کر رہی ہیں۔ کئی ممالک میں ہر سال لاکھوں بچوں کو حفاظتی ٹیکے لگائے جا رہے ہیں، جبکہ نئی نسل کی مچھر دانیاں بڑے پیمانے پر تقسیم کی جا رہی ہیں، جو ملیریا کے پھیلاؤ کو روکنے میں مددگار ثابت ہو رہی ہیں۔ زمینی سطح پر قومی پروگراموں کے اثرات بھی واضح طور پر دکھائی دے رہے ہیں۔

اسی تناظر میں عالمی ادارہ صحت نے اپنے شراکت داروں کے ساتھ ایک عالمی مہم شروع کی ہے جس کا پیغام ہے: “ملیریا کے خاتمے کے لیے عزم—اب ہم کر سکتے ہیں، اب ہمیں کرنا ہی ہوگا۔” یہ صرف ایک نعرہ نہیں بلکہ دنیا بھر کے لیے ایک اجتماعی پکار ہے کہ وقت ہمارے ساتھ ہے، مگر فوری اور مؤثر اقدامات ناگزیر ہیں۔ سن 2000 کے بعد سے لاکھوں کیسز اور کروڑوں اموات کو روکنے میں کامیابی ملی ہے، جو اس جدوجہد کی اہم پیش رفت کو ظاہر کرتی ہے۔اب تک 47 ممالک کو ملیریا سے پاک قرار دیا جا چکا ہے، جبکہ کئی ممالک میں کیسز کی تعداد ہزار سے بھی کم ہو گئی ہے۔ خاص طور پر گریٹر میکونگ خطے نے مشکل حالات کے باوجود تقریباً 90 فیصد کمی حاصل کر کے ایک مثال قائم کی ہے۔ قابل ذکر بات یہ ہےکہ  عالمی سطح پر صورتحال مکمل طور پر تسلی بخش نہیں ہے۔

اعداد و شمار کے مطابق 2024 میں تقریباً 282 ملین کیسز اور 6 لاکھ 10 ہزار اموات رپورٹ ہوئیں، جو پچھلے سال کے مقابلے میں معمولی اضافہ ظاہر کرتی ہیں۔ یہ اس بات کا اشارہ ہے کہ اگرچہ پیش رفت ہوئی ہے، مگر خطرہ ابھی ختم نہیں ہوا۔ ورلڈ ملیریا رپورٹ 2025 کے مطابق کامیابیاں اب بھی خطرے میں ہیں اور چیلنجز مزید پیچیدہ ہوتے جا رہے ہیں۔ادویات کے خلاف مزاحمت ایک بڑا مسئلہ بن کر ابھر رہی ہے، خاص طور پر افریقی ممالک میں آرٹیمیسینن کے خلاف جزوی مزاحمت سامنے آئی ہے۔ اسی طرح مچھروں میں کیڑے مار ادویات کے خلاف مزاحمت بھی بڑھ رہی ہے۔ مالی وسائل کی کمی، عالمی امداد میں کمی، موسمیاتی تبدیلی، تنازعات اور انسانی بحران اس جدوجہد کو مزید مشکل بنا رہے ہیں۔

اس کے باوجود امید کی کرنیں موجود ہیں۔ جدید مچھر دانیاں، وسیع پیمانے پر ویکسینیشن، اور بروقت تشخیص و علاج نے لاکھوں جانیں بچانے میں مدد دی ہے۔ قومی قیادت، مقامی حکمت عملی، عالمی تعاون اور تحقیق میں سرمایہ کاری اس جنگ کی بنیاد ہیں، جبکہ عوامی شمولیت کو مزید مضبوط بنانا ناگزیر ہے۔آج جب ہمارے پاس وسائل، ٹیکنالوجی اور علم موجود ہیں، تو یہ سوال مزید اہم ہو جاتا ہے کہ ملیریا سے کسی کی جان کیوں جائے؟ عالمی یومِ ملیریا 2026 ایک واضح پیغام دیتا ہے کہ اگر ہم متحد ہو جائیں تو ملیریا کا خاتمہ صرف خواب نہیں بلکہ ایک حقیقت بن سکتا ہے۔

بھارت ایکسریس اردو