Satish Kaushik Death: اداکار ستیش کوشک کی موت کے معاملے میں نیا موڑ، فارم ہاؤس کی مالک کی بیوی نے لگایا سازش کا الزام

Satish Kaushik Death:  دہلی پولیس نے منگل کے روز ایک فارم ہاؤس کے مالک وکاس مالو اوران کی الگ رہے رہی بیوی شانوی سے پوچھ گچھ کی۔ فلمساز ستیش کوشک اپنی موت سے ایک دن قبل اس فارم ہاؤس میں منعقدہ پارٹی میں موجود تھے۔ فارم ہاؤس کے مالک کی بیوی نے الزام لگایا تھا کہ ان کے  شوہر اداکار فلمساز سے چھٹکارا حاصل کرنے کا منصوبہ بنا رہے تھے۔

پولیس نے بتایا کہ فارم ہاؤس کے مالک وکاس مالو سے تقریباً ساڑھے تین گھنٹے تک پوچھ گچھ کی گئی جب کہ ان کی بیوی شانوی سے تین گھنٹے تک الگ سے پوچھ گچھ کی گئی۔ انہوں نے بتایا کہ فارم ہاؤس کے  مالک دوپہر ایک بجے جنوبی مغربی ضلع کے پولیس اسٹیشن میں تفتیش میں شامل ہوےاور ان سے کوشک کی موت کے واقعات کے بارے میں پوچھ گچھ کی گئی۔

سینئر افسر نے کہاکہ وہ دوپہر 1 بجے آئےاور تقریباً 4.30 بجے پوچھ گچھ ختم ہوئی۔ پوچھ گچھ کے دوران انہوں نے بتایا کہ کوشک ہولی منانے آئے تھے اور ان کے فارم ہاؤس پر ٹھہرئے تھے۔

فارم ہاؤس کے مالک کے مطابق بالی ووڈ اداکار ستیش کوشک گزشتہ 30 سال سے ان کے دوست تھے۔

پولیس افسر کا کہنا تھا کہ فارم ہاؤس کے مالک کی بیوی اپنے بیان پر قائم  ہیں، لیکن ان کے پاس الزامات کو ثابت کرنے کے لیے کوئی ثبوت نہیں ہیں۔

فارم ہاؤس کے مالک کی بیوی نے دعویٰ کیا ہے کہ اس کے شوہر نے اسے کوشک سے ملوایا تھا۔ انہوں نے بتایا کہ 23 ​​اگست 2022 کو اداکار نے دبئی میں ان سے ملاقات کی اور اپنے شوہر سے 15 کروڑ روپے واپس کرنے کا مطالبہ کیا۔ اس نے اپنی شکایت میں کہا کہ؟ “میں ڈرائنگ روم میں موجود تھی جہاں کوشک اور میرے شوہر کے درمیان جھگڑا ہوا۔ میرے شوہر نے کوشک سے وعدہ کیا کہ وہ جلد ہی رقم واپس کر دیں گے۔ جب میں نے اپنے شوہر سے پوچھا تو اس نے دعویٰ کیا کہ اس نے کوووڈ وبائی مرض کے دوران کوشک کی رقم گنوا دی تھی۔ میرے شوہر نے یہ بھی کہا کہ وہ کوشک سے جان چھڑانے کا منصوبہ بنا رہے ہیں۔

-بھارت ایکسپریس