Van collides with truck in Haveri district: کرناٹک کے ہاویری ضلع میں وین ٹرک سے ٹکرائی، 13 افراد ہلاک، چار زخمی

ہاویری: کرناٹک کے ہاویری کے بیادگی تعلقہ کے گنڈین ہلی چوک پر ایک وین کے مبینہ طور پر ٹرک سے ٹکرانے سے دو بچوں سمیت تیرہ افراد ہلاک اور چار زخمی ہوگئے۔ پولیس نے یہ اطلاع دی۔ انہوں نے بتایا کہ اس حادثے میں ہلاک ہونے والے دو بچوں کی عمریں چار اور چھ سال تھیں۔  پولیس کے مطابق، حادثہ صبح تقریباً 4.45 بجے اس وقت پیش آیا جب ہاویری ضلع کے بیادگی میں قومی شاہراہ 48 پر سڑک کے کنارے کھڑے ٹرک سے وین ٹکرا گئی۔

ایک سینئر اہلکار نے بتایا کہ وین میں کل 17 افراد سوار تھے۔ انہوں نے کہا کہ ان میں سے 11 لوگوں کی موقع پر ہی موت ہو گئی اور دو کو اسپتال میں مردہ قرار دیا گیا۔ انہوں نے کہا کہ چار زخمیوں میں سے دو اسپتال کے انتہائی نگہداشت یونٹ (ICU) میں داخل ہیں۔

  ہاویری کے سپرنٹنڈنٹ آف پولیس انشو کمار سریواستو نے پی ٹی آئی کو بتایا، ’’متاثرین چنچولی مایکا دیوستھان سے شیوموگا ضلع میں اپنے گاؤں یمہٹی جا رہے تھے۔ ٹرک ہائی وے کے کنارے کھڑا تھا۔ ٹیمپو ٹریولر نے پیچھے سے ٹرک کو ٹکر مار دی۔‘‘ انہوں نے بتایا کہ لاشوں کو مردہ خانہ میں لے جایا گیا ہے اور زخمیوں کو ہاویری کے سرکاری اسپتال میں داخل کرایا گیا ہے۔

پولیس کو شبہ ہے کہ حادثہ بس ڈرائیور کو نیند آنے کی وجہ سے پیش آیا۔ ان کا کہنا تھا کہ تصادم کی وجہ سے لاشیں وین کے تباہ شدہ حصوں میں پھنس گئیں اور انہیں نکالنے کے لیے محکمہ فائر بریگیڈ اور پولیس اہلکاروں کو کافی محنت کرنا پڑی۔

پولیس نے بتایا کہ مرنے والوں کی شناخت ناگیش، وشالکشی، آدرش، ارپیتا، پرشورام، بھاگیہ، پونیا، مانسا، روپا، سبھدرا بائی، منجولا بائی اور منجولا کے طور پر کی گئی ہے۔  پولیس کا کہنا ہے کہ مرنے والوں میں سے ایک کی تاحال شناخت نہیں ہو سکی ہے۔ انہوں نے بتایا کہ ناگیش، وشالکشی، آدرش  اور ارپیتا ایک ہی خاندان سے تعلق رکھتے تھے۔ یہ بھی انکشاف ہوا کہ ناگیش گاڑی چلا رہا تھا۔  پولیس کا کہنا ہے کہ واقعہ کے سلسلے میں مقدمہ درج کر لیا گیا ہے اور مزید تفتیش جاری ہے۔

بھارت ایکسپریس۔