Four labourers killed in South Goa: گوا میں تیز رفتار بس کا قہر، بہار کے 4 مزدوروں کی ہلاکت، 9 افراد شدید زخمی

گوا: گوا کے ورنا علاقے میں تیز رفتاری کی تباہی دیکھی گئی ہے۔ یہاں ایک بس نے ٹینٹ میں سوئے ہوئے کئی مزدوروں کو کچل دیا۔ اس حادثے میں چار افراد کی موقع پر ہی موت ہو گئی۔

معلومات کے مطابق ورنا علاقے میں ایک تیز رفتار بس سڑک کے کنارے لگے خیمے سے ٹکرا گئی اور وہاں سوئے ہوئے کئی مزدوروں کو کچل دیا۔ اس حادثے میں چار افراد کی المناک موت ہو گئی ہے اور نو افراد زخمی بتائے جا رہے ہیں۔

حادثے میں زخمی ہونے والے تمام 9 افراد کو علاج کے لیے قریبی اسپتال میں داخل کرایا گیا ہے، زخمیوں کی حالت تشویشناک بتائی جاتی ہے۔ معلومات کے مطابق مرنے والے تمام مزدور بہار کے رہنے والے تھے۔

حادثے کے بعد ایک ویڈیو بھی منظر عام پر آئی ہے۔ ویڈیو میں دیکھا جا سکتا ہے کہ بس کے اندر داخل ہونے کے بعد خیمہ بری طرح تباہ ہو گیا ہے۔ مقامی لوگوں نے بتایا کہ بس ڈرائیور نشے میں تھا، وہ بس کو ٹرن نہیں کر پایا اور بس مزدوروں کے ٹینٹ میں جا گھسی۔

وہیں، پولیس نے اتوار کے روز بتایا کہ جنوبی گوا ضلع میں ایک صنعتی اسٹیٹ میں ایک نجی بس سڑک کے کنارے دو جھونپڑیوں سے ٹکرا جانے سے چار مزدور ہلاک اور پانچ دیگر شدید زخمی ہو گئے۔

انہوں نے بتایا کہ حادثہ ہفتہ کی رات تقریباً 11.30 بجے ورنا انڈسٹریل اسٹیٹ میں اس وقت پیش آیا جب سڑک کی تعمیر کے کام میں مصروف مزدور جھونپڑیوں میں سو رہے تھے۔

ڈپٹی سپرنٹنڈنٹ آف پولیس سنتوش دیسائی نے بتایا کہ بس ڈرائیور کی شناخت قریبی کارٹولم گاؤں کے رہنے والے بھرت گویکر کے طور پر ہوئی ہے۔ اس کو حراست میں لے لیا گیا ہے اور اس سے پوچھ گچھ کی جا رہی ہے۔

انہوں نے کہا کہ ڈرائیور کے طبی معائنے میں اس بات کی تصدیق ہوئی ہے کہ وہ واقعے کے وقت شراب کے نشے میں تھا۔

ایک مزدور نے دعویٰ کیا کہ بس ڈرائیور نے جائے وقوعہ پر موجود دیگر مزدوروں کو دھمکی دی کہ اگر انہوں نے واقعے کی کسی سے شکایت کی تو وہ انہیں قتل کر دے گا۔

ایک پولیس اہلکار نے بتایا کہ ایک نجی کمپنی کے عملے کو لے جانے والی بس نے دو جھونپڑیوں کو ٹکر ماری جہاں مزدور سو رہے تھے۔ انہوں نے بتایا کہ “چار مزدور موقع پر ہی دم توڑ گئے جبکہ پانچ شدید زخمی ہوئے اور انہیں گوا میڈیکل کالج اور اسپتال میں داخل کرایا گیا۔”

بھارت ایکسپریس۔