Severe heat in Jharkhand: جھارکھنڈ میں شدید گرمی، بہراگورہ میں درجہ حرارت 47.1 ڈگری کیا گیا ریکارڈ، ایک شخص کی موت، ایک زیر علاج

رانچی: جھارکھنڈ شدید گرمی کی زد میں ہے اور منگل کے روز مشرقی سنگھ بھوم ضلع کے بہراگوڑا میں زیادہ سے زیادہ درجہ حرارت 47.1 ڈگری سیلسیس تک پہنچ گیا۔ محکمہ موسمیات نے شدید گرمی کے پیش نظر بدھ کے لیے ریاست کے 11 اضلاع کے لیے ‘یلو الرٹ’ جاری کیا ہے۔ ایک اہلکار نے بتایا کہ بدھ کے روز زیادہ سے زیادہ درجہ حرارت معمول سے دو سے تین ڈگری سیلسیس زیادہ ہو سکتا ہے۔

اہلکار نے بتایا کہ شدید گرمی کی وجہ سے منگل کے روز دمکا بس اسٹینڈ پر دو افراد بے ہوش پائے گئے۔ دمکا نگر پولیس اسٹیشن کے انچارج امت لاکڑا نے بتایا، “انہیں پھلو جھانو میڈیکل کالج اسپتال لایا گیا، جن میں سے ایک کو مردہ قرار دیا گیا جب کہ دوسرے کا علاج کیا جارہا ہے۔” انہوں نے بتایا کہ مہلوک کی شناخت 32 سالہ شیو کمار منڈل کے طور پر کی گئی ہے۔

اسپتال کے سپرنٹنڈنٹ ڈاکٹر انکور پورتی نے پی ٹی آئی کو بتایا، “پوسٹ مارٹم کے بعد ہی ہم یہ معلوم کر سکیں گے کہ آیا اس شخص کی موت ہیٹ اسٹروک کی وجہ سے ہوئی یا کسی اور وجہ سے۔” دوسرے شخص کے خون کا نمونہ بھی لے کر ٹیسٹ کے لیے بھیج دیا گیا ہے تاکہ بے ہوشی کی وجہ معلوم کی جا سکے۔

محکمہ موسمیات کے ایک افسر نے بتایا کہ صاحب گنج، گوڈا، پاکور، دمکا، جامتاڑا، دیوگھر، دھنباد، بوکارو، سرائیکیلا-کھرساواں، مشرقی اور مغربی سنگھ بھوم میں منگل کے روز شدید گرمی پڑی اور بدھ کے روز بھی یہی صورتحال برقرار رہ سکتی ہے۔

انہوں نے بتایا کہ منگل کے روز سب سے زیادہ درجہ حرارت مشرقی سنگھ بھوم ضلع کے بہراگوڑا میں 47.1 ڈگری سیلسیس ریکارڈ کیا گیا، جب کہ جمشید پور شہر، گوڈا اور سرائی کیلا میں 45.5 ڈگری سیلسیس ریکارڈ کیا گیا۔

رانچی میٹرولوجیکل سنٹر کے انچارج ابھیشیک آنند نے پی ٹی آئی کو بتایا، ’’جھارکھنڈ کا تقریباً آدھا حصہ شدید گرمی کی لپیٹ میں ہے۔ یہی صورتحال آئندہ 48 گھنٹوں تک برقرار رہنے کا امکان ہے اور پارہ دو سے تین ڈگری تک بڑھ سکتا ہے۔

یہ بھی پڑھیں: راج ببر کو گروگرام اور آنند شرما کو کانگڑا سے ملا ٹکٹ، کانگریس نے جاری کی ایک اور امیدوار کی فہرست

انہوں نے کہا، “ریاست کے سنتھال پرگنہ علاقے میں بارش کے امکان کے ساتھ، 4 اپریل سے بڑھتے ہوئے پارے سے جزوی راحت کی توقع ہے۔”

بھارت ایکسپریس۔