Odisha Official CM House Search: اوڈیسہ میں نہیں ہے کوئی سی ایم ہاوس،کہاں رہیں گے نئے وزیراعلیٰ،نوین پٹنایک 24 سال تک گھر سے کرتے رہے کام

اوڈیشہ میں 24 سال بعد حکومت تبدیلی ہوئی ہے، کیونکہ 2024 کے اسمبلی انتخابات میں بی جے پی نے بی جے ڈی کے خلاف اکثریت حاصل کی ہے۔ ایسے میں یہاں حکومت سازی کی کوششیں تیز ہو گئی ہیں۔ بی جے پی نے وزیر دفاع راج ناتھ سنگھ اور کابینی وزیر بھوپیندر یادو کو مبصر بنایا ہے۔ آج بی جے پی میں قانون ساز پارٹی کی میٹنگ ہونی ہے اور بدھ کو نئے وزیر اعلی کی حلف برداری کی تقریب ہونی ہے۔ ان سب کے درمیان ایک بڑا سوال یہ ہے کہ اڈیشہ کے نئے وزیر اعلیٰ کہاں رہیں گے، کیونکہ اڈیشہ میں وزیر اعلیٰ کی کوئی سرکاری رہائش گاہ نہیں ہے۔

دراصل، فی الحال اوڈیشہ میں وزیر اعلی کی کوئی سرکاری رہائش نہیں ہے۔ حکومت کی تشکیل تک قائم مقام وزیر اعلیٰ نوین پٹنائک پچھلے 24 سالوں سے اپنے والد بیجو پٹنائک کے بنائے ہوئے آبائی گھر سے کام کر رہے تھے۔ محکمہ جنرل ایڈمنسٹریشن نے نئے وزیر اعلیٰ کی رہائش گاہ کی تلاش شروع کر دی ہے۔ایک رپورٹ میں، ٹائمز آف انڈیا نے اوڈیشہ کے ایک اہلکار کے حوالے سے کہا ہے کہ چیف منسٹر شکایت سیل سمیت کچھ خالی جگہوں کو وزیراعلیٰ کی رہائش کے لیے شارٹ لسٹ کیا گیا ہے۔  کوارٹر کے انتخاب کے بعد اس میں  موڈیفیکیشن  کی جائے گی اور اس میں کچھ وقت لگے گا۔

آپ کو بتادیں کہ کانگریس کے سابق وزیر اعلیٰ جے بی پٹنائک اور گریدھر گامانگ راج بھون اور اے جی اسکوائر کے درمیان واقع ایک سرکاری کوارٹر میں رہتے تھے۔ اس گھر کو بعد میں نوین پٹنائک نے وزیر اعلی کے شکایت سیل میں تبدیل کر دیا تھا۔جب تک وزیر اعلی کے رہنے کے لیے مناسب گھر نہیں مل جاتا، اسٹیٹ گیسٹ ہاؤس میں عارضی رہائش کے لیے ایک  آفس تیار کرنے کا منصوبہ بنایا جا رہا ہے۔قابل ذکر ہے کہ بی جے پی نے 147 رکنی اسمبلی میں 78 سیٹیں جیت کر اکثریت حاصل کی ہے اور حالانکہ پارٹی نے ابھی تک اپنی مقننہ پارٹی کے لیڈر کا اعلان نہیں کیا ہے۔ مانا جا رہا ہے کہ آج بی جے پی کی طرف سے اپنے وزیر اعلیٰ کو لے کر کوئی بڑا اعلان ہو سکتا ہے۔

بھارت ایکسپریس۔