Noida Viral Video: چوہے کو مارنے کی ویڈیو وائرل ہونے کے بعد ایک شخص گرفتار، پولیس نے بتایا کس وجہ سے ہوئی گرفتاری

نوئیڈا: اترپردیش کے نوئیڈا ضلع سے حیران کن خبر سامنے آرہی ہے۔ بتایا جا رہا ہے کہ نوئیڈا پولیس نے ایک شخص کو چوہے کے قتل کے معاملے میں گرفتار کیا ہے۔ اس حوالے سے سوشل میڈیا پر ایک ویڈیو تیزی سے وائرل ہو رہی ہے، جس میں ایک شخص بار بار چوہے پر بائیک چلاتے ہوئے نظر آ رہا ہے۔ بتایا جا رہا ہے کہ اس نے زبردستی چوہے کو مارا اور چوہا جب تک مر نہیں گیا، تب تک اس پر بائیک چڑھاتا رہا۔ اس کی ویڈیو وائرل ہونے کے بعد پولیس نے اسے گرفتار کر لیا ہے۔ ساتھ ہی اس حوالے سے پولیس کی جانب سے ایک بیان بھی جاری کیا گیا ہے، جس میں اس شخص کی گرفتاری کی ایک اور وجہ بتائی گئی ہے۔ فی الحال یہ معاملہ سوشل میڈیا پر بحث کا موضوع بنا ہوا ہے۔

نوئیڈا میں ہوٹل چلاتا ہے زین الدین

ذرائع کے مطابق نوئیڈا کے مامورا میں ہوٹل چلانے والے زین الدین نامی نوجوان کی ایک ویڈیو سوشل میڈیا پر وائرل ہو رہی ہے، جو اپنی بائیک سے سڑک پر پڑے چوہے کو کچلتا ہوا نظر آ رہا ہے۔ ویڈیو میں وہ چوہے کے اوپر گاڑی کو آگے پیچھے چلاتے ہوئے نظر آ رہے ہیں، جس سے چوہے کی موت ہوجاتی ہے۔ اس کی ویڈیو وائرل ہونے کے بعد پولیس نے زین الدین کو گرفتار کر لیا ہے۔ بتایا جا رہا ہے کہ زین الدین کی گرفتاری چوہے کے قتل کے الزام میں ہوئی ہے۔ اس تعلق سے سوشل میڈیا پر طرح طرح کے چرچے ہو رہے ہیں۔ دوسری جانب اس معاملے میں نوئیڈا کے پولس کمشنر لکشمی سنگھ کا کہنا ہے کہ مارپیٹ کے معاملے میں اس کو گرفتار کیا گیا ہے۔ اس کے ساتھ ہی خبریں آ رہی ہیں کہ پولیس کمشنر لکشمی سنگھ نے اس گرفتاری کو مسترد کر دیا ہے اور معاملے کی جانچ کا حکم دیا ہے۔

نوئیڈا پولیس نے بتائی یہ وجہ

نوئیڈا پولس کا ایک بیان ٹویٹر پر وائرل ہو رہا ہے، جس میں بتایا گیا ہے کہ 24 جولائی کو پولیس اسٹیشن فیز 3 کی گشت کے دوران پتہ چلا کہ زین الدین ولد مطلوب احمد ساکن گلی نمبر 5، ممورا، نوئیڈا، گاہکوں سے پیسے کے متعلق اپنی بریانی کی دکان پر ہنگامہ کر رہا تھا۔ اسے سمجھانے کی کوشش کی گئی لیکن وہ مزید مشتعل ہو گیا۔ اس کے بعد اس کے خلاف سیکشن 151 سی آر پی سی کے تحت گرفتار کرکے کارروائی کی گئی ہے۔ اس کے ساتھ پولیس نے یہ بھی لکھا ہے کہ مذکورہ گرفتاری کو چوہے کے واقعہ سے جوڑ کر سوشل میڈیا پر وائرل کیا جا رہا ہے۔ اس کے ساتھ پولیس نے یہ بھی کہا ہے کہ چوہے سے متعلق وائرل ویڈیو کا اس گرفتاری سے کوئی تعلق نہیں ہے۔

بھارت ایکسپریس۔