Omar Abdullah & Lok Sabha Elections : جموں کشمیر کو اگر باہری لوگوں سے آزادی دلانی ہے تو پھر…….عمر عبداللہ نے انتخابی مہم کے دوران دیا بڑا بیان

پانچویں مرحلے کی ووٹنگ سے قبل نیشنل کانفرنس کے نائب صدر اور بارہمولہ کے امیدوار عمر عبداللہ نے اپنی انتخابی مہم تیز کر دی ہے۔ بارہمولہ میں عمر عبداللہ لوگوں کے درمیان گئے اور ان سے ووٹ مانگے۔ اس دوران انہوں نے اپنے دادا کے اچھے کاموں کا بھی ذکر کیا۔ بارہمولہ پارلیمانی حلقہ سے پہلی بار انتخاب لڑنے والے عمر عبداللہ نے کہا کہ یہ علاقہ ان کے لیے نیا نہیں ہے، کیونکہ وہ پہلے بھی اپنی پارٹی کے لیے ووٹ مانگ چکے ہیں۔

عمر عبداللہ نے کہا، ’’آج میں آپ کو یاد دلانا چاہتا ہوں کہ یہ مرحوم شیخ عبداللہ تھے جنہوں نے ایک پیسہ لیے بغیر جموں و کشمیر کے لوگوں کو زمین کا حق دیا۔ جموں و کشمیر کے لوگ اسی سیاسی محرومی سے گزر رہے ہیں جب کشمیر کے لوگوں کو بیچا گیا تھا۔ معاہدہ امرتسر کے ذریعے ایک بادشاہ دوسرے بادشاہ کے پاس چلا گیا اور اس کے بعد اگست 2019 میں جب آرٹیکل 370 ہٹایا گیا تو ہمارے ساتھ بھی وہی سلوک کیا گیا اور ہمیں اسی سیاسی غلامی کی طرف دھکیلا گیا۔

عمر عبداللہ کا بی جے پی پر حملہ

بی جے پی کو نشانہ بناتے ہوئے عمر عبداللہ نے کہا کہ 2018 کے بعد جموں و کشمیر میں کوئی سیاسی طور پر منتخب حکومت نہیں ہے، آرٹیکل 370 کی منسوخی کے بعد ہماری زمینیں فروخت کے لیے رکھ دی گئی ہیں۔ ریلوے، سڑکوں اور فیکٹریوں کے نام پر زمینیں لی جا رہی ہیں اور لوگوں کو ان کی زمینوں سے بے دخل کیا جا رہا ہے۔نیشنل کانفرنس کے نائب صدر عمر عبداللہ نے لوگوں سے کہا کہ اگر وہ باہر کے لوگوں سے آزادی چاہتے ہیں تو نیشنل کانفرنس کو ووٹ دیں۔ ہمارے ٹھیکیدار باہر کے ہیں، ان کے مزدور باہر کے ہیں، ہماری سڑکوں پر ٹول لینے والے بھی باہر کے ہیں اور ہمارے نوجوانوں کو جو دیا جا رہا ہے وہ صرف شراب اور منشیات ہے۔اس لئے اگر آپ جموں کشمیر میں باہر کے لوگوں سے آزادی چاہتے ہیں تو نیشنل کانفرنس کو ووٹ دیں ۔

بھارت ایکسپریس۔