Dumka Road Accident: جھارکھنڈ کے دمکا میں دردناک حادثہ، ٹرک کی ٹکر سے آٹو کے پرخچے اُڑے ، چار افراد ہلاک، چار کی حالت تشویشناک

دمکا: جھارکھنڈ کے دمکا ضلع کے مفصل تھانہ علاقے میں ہفتہ کی شام ایک دردناک سڑک حادثہ پیش آیا، جس میں چار لوگوں کی موت ہو گئی، جب کہ چھ شدید زخمی ہو گئے۔ مرنے والوں میں دو خواتین بھی شامل ہیں۔ زخمیوں کو علاج کے لیے دمکا کے پھول جھانو میڈیکل کالج اسپتال میں داخل کرایا گیا ہے۔

حادثہ داسورائے ڈیہ گاؤں کے قریب اس وقت پیش آیا جب ایک ٹرک نے سامنے سے مسافروں سے لدے آٹو کو ٹکر مار دی۔ بتایا جا رہا ہے کہ آٹو میں سوار لوگ نونی ہاٹ بلاک کے رہنے والے تھے۔ سبھی دمکا کے مشہور سیاحتی مقام مسانجور پر پکنک منانے گئے تھے۔ وہاں سے واپسی کے دوران یہ حادثہ پیش آیا۔

ٹرک کی ٹکر سے آٹو کے پرخچے اڑ گئے۔ حادثے کے بعد چیخ و پکار سن کر آس پاس کے لوگ دوڑے۔ اطلاع ملتے ہی پولیس بھی موقع پر پہنچ گئی۔ اس کے بعد تمام زخمیوں کو میڈیکل کالج بھیج دیا گیا۔

زخمیوں میں تین سے چار افراد کی حالت انتہائی تشویشناک بتائی جاتی ہے۔ فی الحال ہلاک اور زخمی ہونے والوں کے نام کا پتہ نہیں چل پایا ہے۔

31 دسمبر سے لے کر اب تک جھارکھنڈ میں مختلف سڑک حادثات میں 30 افراد ہلاک ہو چکے ہیں۔ جمعہ کے روز پلامو ضلع کے ستبروا تھانہ علاقے کے کیسیاڈیہ میں قومی شاہراہ 75 پر مسافر بس اور ٹرک کے درمیان خوفناک تصادم میں ٹرک ڈرائیور سمیت تین افراد ہلاک ہو گئے تھے۔ اس حادثے میں 13 افراد شدید زخمی ہو گئے تھے۔

اس سے قبل 2 جنوری کو لاتیہار ضلع کے مانیکا تھانہ علاقے میں NH 39 پر ڈگری کالج کے قریب موٹر سائیکل اور بولیرو کے درمیان تصادم میں تین نوجوان ہلاک ہو گئے تھے۔

بھارت ایکسپریس۔