Accident in Varanasi: وارانسی کے پھولپور میں دردناک حادثہ، کار اور ٹرک کے درمیان ہوا زبردست تصادم، ایک ہی خاندان کے 8 افراد ہلاک

وارانسی: اتر پردیش کے وارانسی ضلع کے پھولپور تھانہ علاقے میں وارانسی-لکھنؤ ہائی وے پر بدھ کے روز کار اور ٹرک کے درمیان تصادم میں ایک ہی خاندان کے آٹھ افراد کی موت ہو گئی۔ پولیس ذرائع نے یہ اطلاع دی۔ انہوں نے بتایا کہ وارانسی-لکھنؤ ہائی وے پر پھولپور تھانہ علاقے کے کارکھیانوو علاقے میں ایک کار اور ٹرک کے درمیان زبردست تصادم ہوا، جس کی وجہ سے کار میں سوار آٹھ افراد کی موت ہو گئی۔ ذرائع کے مطابق ہلاک ہونے والے تمام افراد کا تعلق ایک ہی خاندان سے بتایا جاتا ہے۔ انہوں نے بتایا کہ حادثے میں ایک تین سالہ بچہ زخمی ہوا، جسے اسپتال میں داخل کرایا گیا ہے۔

 پیلی بھیت کے رہنے والے تھے کار میں سوار تمام لوگ

پولیس کے مطابق کار میں سوار تمام لوگ پیلی بھیت کے رہنے والے تھے اور وارانسی میں پوجا کرنے کے بعد جونپور جا رہے تھے۔ تمام لاشوں کو پوسٹ مارٹم کے لیے بھیج دیا گیا ہے۔ اتر پردیش کے وزیر اعلی یوگی آدتیہ ناتھ نے اس حادثے پر گہرے دکھ کا اظہار کیا ہے۔ ریاستی حکومت کے ترجمان کے مطابق، وزیر اعلیٰ نے مہلوک کی روح کے سکون کے لیے دعا کی ہے اور سوگوار خاندان سے تعزیت کا اظہار کیا ہے۔ انہوں نے ضلعی انتظامیہ کے افسران کو بچے کے مناسب علاج کو یقینی بنانے کی بھی ہدایت کی ہے۔

بھارت ایکسپریس۔