Ram Mandir: زبردستی کریڈٹ لینے کی کوشش… رام مندر کا ذکر کرتے ہوئے بی جے پی پر بر ہم ہوئے بھوپیش بگھیل

رام مندر کا افتتاح  22 جنوری کو ہو نے جارہا ہے ۔ اس معاملہ پر سیاست بھی تیز ہوگئی ہے۔ اپوزیشن اس معاملہ کو لے کر مرکز میں برسراقتدار بی جے پی پر مسلسل حملہ کر رہی ہے۔ اب چھتیس گڑھ کے سابق وزیراعلی بھوپیش بگھیل نے کہا کہ بی جے پی چاہے جتنا بھی شور مچائے، رام مندر عدالت کے حکم پر بن رہا ہے۔ بی جے پی اس معاملے پر سیاست کر رہی ہے۔

بھوپیش بگھیل نے کہا، ’’رام مندر سپریم کورٹ کی ہدایت پر بنایا گیا ہے۔ راجیو گاندھی نے، جب وہ وزیر اعظم تھے، کہا تھا کہ عدالت کے حکم سے نہ ایک انچ آگے ہوگا اور نہ ایک انچ پیچھے۔ بھلے ہی بی جے پی شور مچاتی   رہے لیکن رام مندر صرف عدالت کے حکم پر بن رہا ہے، وہ یعنی بی جے پی کریڈٹ لینے کی کوشش کر رہی ہے۔ ہمارا موقف شروع سے رہا ہے، عدالت کا حکم مانیں گے مگرآج یہ لوگ سیاست کر رہے ہیں۔

ایودھیا ہوائی اڈہ کب تک فروخت ہونے سے بچ پائے گا – بگھیل

ایودھیا کے نو تعمیر شدہ  ہوائی اڈے کے بارے میں سابق وزیر اعلی بگھیل نے کہا، “ہر جگہ ہوائی اڈے بننا چاہئے، کون روک رہا ہے لیکن آپ کیوں بیچ رہے ہیں؟” ایک ہوائی اڈہ بن رہا ہے اور دوسری طرف آپ اسے بھی بیچ رہے ہیں۔ کون بتا سکتا ہے کہ ایودھیا میں بنایا گیا ہوائی اڈہ کب تک فروخت نہیں ہوگا؟ایودھیا میں بننے والے نئے ہوائی اڈے کا نام مہارشی والمیکی انٹرنیشنل ایئرپورٹ رکھا گیا ہے۔ اس کا افتتاح وزیر اعظم  نریندر مودی نے 30 دسمبر کو کیا تھا۔ یہ ہوائی اڈہ 1450 کروڑ روپے کی لاگت سے تیار کیا گیا ہے۔ خیال کیا جاتا ہے کہ یہاں سے ہر سال 10 لاکھ مسافروں کی آمدورفت ہوگی۔

آپ کو بتاتے چلیں کہ جہاں کانگریس اس کا کریڈٹ عدالت کو دے رہی ہے وہیں رام للا کے چیف پجاری آچاریہ ستیندر داس نے حال ہی میں میڈیا سے بات چیت میں کہا تھا کہ ملک میں عدالتیں کئی سالوں سے ہیں لیکن فیصلہ کیوں نہیں کیا گیا؟ اس حوالے سے جب حکومتیں آئیں تو ایسا کیوں نہیں کیا گیا؟