Cloudburst In Uttarakhand: اتراکھنڈ کے ردرپریاگ اور چمولی میں قہر برپا، بادل پھٹنے سے دو افراد لاپتہ، دو زخمی

اتراکھنڈ کے ردرپریاگ اور چمولی اضلاع میں جمعہ کے روز بادل پھٹنے کے واقعات نے تباہی مچا دی۔ شدید بارش اور پہاڑوں سے آنے والے ملبے نے کئی دیہاتوں کو اپنی لپیٹ میں لے لیا۔ دیکھتے ہی دیکھتے پانی اور ملبہ گھروں میں داخل ہو گیا، جبکہ کئی مقامات پر سڑکیں اور پل بہہ گئے۔چمولی ضلع کے دیوال علاقے کے موپاٹا گاؤں میں بادل پھٹنے کے باعث دو افراد، تارا سنگھ اور ان کی اہلیہ لاپتہ ہو گئے ہیں، جب کہ وکرم سنگھ اور ان کی بیوی کے زخمی ہونے کی اطلاع ملی ہے۔ امدادی ٹیمیں جے سی بی مشینوں کی مدد سے ملبہ ہٹانے میں مصروف ہیں تاکہ متاثرہ افراد تک جلد رسائی حاصل کی جا سکے۔

وزیراعلیٰ پشکر سنگھ دھامی کا بیان

وزیراعلیٰ پشکر سنگھ دھامی نے سوشل میڈیا پلیٹ فارم ایکس پر واقعے پر افسوس کا اظہار کرتے ہوئے کہا کہ وہ مسلسل افسران سے رابطے میں ہیں۔ انہوں نے ردرپریاگ کے بسوکی دار علاقے کے بڑےٹھ ڈونگر توک اور چمولی کے دیوال علاقے میں بادل پھٹنے سے متاثرہ خاندانوں کو فوری امداد فراہم کرنے کی ہدایت دی ہے۔وزیراعلیٰ نے کہا:”میں مسلسل ضلعی انتظامیہ اور آفات سے نمٹنے والے حکام کے ساتھ رابطے میں ہوں۔ تمام ضروری اقدامات تیزی سے کیے جا رہے ہیں۔ متاثرہ علاقوں میں بچاؤ اور راحت کا کام پوری سنجیدگی کے ساتھ جاری ہے۔”

مزید نقصانات اور خطرناک صورتحال
چمولی کے کالیشور علاقے میں پہاڑ سے آئے ملبے نے کئی گھروں کو شدید نقصان پہنچایا ہے۔ ایک گاؤشالہ بھی دب گئی ہے جس میں 15 سے 20 مویشیوں کے پھنسنے کا خدشہ ہے۔شدید بارش کے باعث جوشی مٹھ، نارائن بگڑ، تھرالی، نندن نگر، کرن پریاگ، غیرسین اور دشولی علاقوں میں ندی نالے ابل پڑے ہیں۔

الکنندا ندی خطرے کے نشان سے اوپر

رپورٹس کے مطابق ردرپریاگ میں الکنندا اور مندکنی ندیوں کے پانی کی سطح مسلسل بلند ہو رہی ہے۔ الکنندا ندی نے خطرے کے نشان کو عبور کر لیا ہے اور اس کا پانی رہائشی علاقوں میں داخل ہو چکا ہے۔ انتظامیہ نے کئی گھروں کو احتیاطاً خالی کروا لیا ہے۔صورتحال اس قدر سنگین ہو گئی ہے کہ ردرپریاگ کا تاریخی ہنومان مندر ندی کی دھارا میں بہہ گیا ہے۔ اسی دوران کیدار گھاٹی کے لاوارا گاؤں میں ایک پل بھی تیز بہاؤ میں بہہ گیا، جبکہ چھیانا گڈ اور ملحقہ علاقوں میں حالات انتہائی نازک ہیں۔

آمد و رفت مکمل طور پر متاثر
مسلسل موسلا دھار بارش نے عوامی زندگی کو مفلوج کر دیا ہے۔ ردرپریاگ-گوری کنڈ، اور رِشی کیش-بدری ناتھ جیسے اہم قومی شاہراہیں ملبے اور لینڈ سلائیڈنگ کے باعث بند ہو چکی ہیں۔ جگہ جگہ لینڈ سلائیڈنگ نے سڑکوں کو بلاک کر دیا ہے، اور سینکڑوں گاڑیاں راستے میں پھنسی ہوئی ہیں۔مقامی لوگوں کے مطابق، بارش اس قدر شدید ہے کہ کئی دیہاتوں میں لوگ اپنے گھروں کو چھوڑنے پر مجبور ہو گئے ہیں۔ کالی مت گھاٹی اور بیسن-کیدار علاقے میں بھی شدید بارش نے صورتحال کو مزید ابتر بنا دیا ہے۔اتراکھنڈ ایک بار پھر قدرتی آفات کی زد میں ہے۔ حکومت، انتظامیہ، اور بچاؤ ٹیمیں متحرک ہیں لیکن موسمی حالات نے حالات کو پیچیدہ بنا دیا ہے۔ عوام سے اپیل کی گئی ہے کہ وہ محفوظ مقامات پر منتقل ہو جائیں اور انتظامیہ کی ہدایات پر عمل کریں۔

بھارت ایکسپریس اردو