Mallikarjun Kharge: بابا صدیقی کے قتل پر کھڑگے برہم، کہا – مجرموں کو جلد سے جلد سزا ملنی چاہیے

مہاراشٹر میں این سی پی لیڈر بابا صدیقی کو گولی مار کر ہلاک کر دیا گیا ہے۔ اس قتل سے پورا ممبئی صدمے میں ہے۔ اس حوالے سے ملک بھر سے ردعمل سامنے آ رہے ہیں۔ کانگریس صدر ملکارجن کھڑگے نے بھی اس سیاسی قتل پر ردعمل ظاہر کیا ہے۔ انہوں نے سوشل میڈیا سائٹ X پر پوسٹ کیا اور کہا، ‘مہاراشٹر کے سابق وزیر بابا صدیقی کا افسوسناک قتل  بیان سے باہر ہے۔ دکھ کی اس گھڑی میں، میں ان کے اہل خانہ، دوستوں اور حامیوں کے تئیں اپنی گہری تعزیت کا اظہار کرتا ہوں۔

ملکارجن کھڑگے نے مزید لکھا، “میں ان کے خاندان اور حامیوں کے تئیں اپنی گہری تعزیت کا اظہار کرتا ہوں۔ انصاف کو یقینی بنایا جانا چاہیے اور مہاراشٹر کی موجودہ حکومت کو مکمل اور شفاف تحقیقات کا حکم دینا چاہیے۔ مجرموں کو جلد از جلد سزا ملنی چاہیے۔ احتساب سب سے اہم ہے۔

حملہ آوروں نے گھات لگا کر حملہ کیا

بابا صدیقی کو ہفتہ 12 اکتوبر 2024 کو باندرہ میں گولی مار کر ہلاک کر دیا گیا تھا۔ ذرائع کے مطابق دو سے تین لوگوں نے ان کے دفتر کے باہر گھات لگا کر حملہ کیا۔ جیسے ہی وہ دفتر پہنچے، حملہ آور دوڑتے ہوئے آئے اور بابا صدیقی پر اندھا دھند گولیوں کے کئی راؤنڈ فائر کردیئے۔ انہیں دو تین گولیاں لگیں ،جن میں سے ایک سینے میں لگی۔ قریب کھڑے ایک ساتھی کو بھی ٹانگ میں گولی لگی۔

یہ واقعہ ہفتہ کی رات تقریباً 9.30 بجے پیش آیا۔ قاتل گولی مار کر موقع سے فرار ہوگئے۔ مختلف مقامات پر پتلے جلانے کی وجہ سے پٹاخوں کی آوازوں کے درمیان گولیوں کی آواز بھی نہیں سنی گئی۔ جیسے ہی کچھ لوگوں کو معلوم ہوا کہ فائرنگ ہو رہی ہے، اس کے ساتھی اور وہاں موجود لوگ انہیں لے کر باندرہ کے لیلاوتی اسپتال پہنچے، لیکن تب تک ان کی موت ہو چکی تھی۔ ساتھ ہی این سی پی کے سربراہ اور مہاراشٹر کے وزیر اعلی اجیت پوار نے بھی بابا صدیقی کے قتل پر دکھ کا اظہار کیا ہے اور کہا کہ ملزمان کے خلاف سخت کارروائی کی جائے گی۔
مہاراشٹر کے نائب وزیر اعلی اور وزیر داخلہ دیویندر فڑنویس سینئر پولیس افسران کے ساتھ لیلاوتی اسپتال پہنچے ہیں۔ دوسری جانب بی جے پی لیڈر کریٹ سومیا نے کہا کہ بابا صدیقی کا قتل تشویشناک ہے۔ حکومت ایک خصوصی ٹیم بنا کر اس کی تحقیقات کرے۔ یہ ایک بہت بڑی سازش لگتی ہے۔ سخت ایکشن لیا جائے۔

اجیت پوار نے تمام پروگرام منسوخ کر دیئے

بابا صدیقی کی موت کی خبر نے مہاراشٹر کی سیاست اور بالی ووڈ دونوں کو ہلا کر رکھ دیا ہے کیونکہ وہ بہت مقبول شخصیت تھے۔ این سی پی لیڈر اجیت پوار نے اپنے تمام پروگرام منسوخ کر دیے ہیں اور ممبئی واپس لوٹ رہے ہیں۔

بھارت ایکسپریس