Huge firecracker explosion rocks Kerala temple festival :کیرالہ میں آتش بازی کے دوران دردناک حادثہ، 150 سے زائد افراد زخمی، 8 کی حالت تشویشناک

کیرالہ کے کاسرگوڈ ضلع میں نیلیشور کے قریب ایک مندر میں آتش بازی کے دوران ایک خوفناک حادثہ پیش آیا ہے۔ پیر کی رات دیر گئے اس حادثے میں 150 سے زیادہ لوگ زخمی ہو گئے۔ زخمیوں میں سے 8 کی حالت تشویشناک ہے۔ موصولہ اطلاع کے مطابق  پولیس کو شبہ ہے کہ یہ حادثہ ویراکاو مندر کے قریب پٹاخے کے ذخیرہ میں آگ لگنے کے بعد پیش آیا۔

حادثے کے فوراً بعد زخمیوں کو کاسرگوڈ، کننور اور منگلورو کے اسپتالوں میں لے جایا گیا۔ تشویشناک صورتحال کے پیش نظر ضلع انتظامیہ کے اعلیٰ افسران بشمول کلکٹر اور ضلع پولیس سربراہ موقع پر پہنچ گئے ہیں۔ انہوں نے متاثرہ افراد کو ریلیف فراہم کرنے کے لیے فوری اقدامات کرنے کی ہدایت کی ہے۔ ساتھ ہی کیرالہ پولیس نے ایف آئی آر درج کرکے پورے معاملے کی جانچ شروع کردی ہے۔

پٹاخوں میں زبردست آگ لگ گئی، 2 جاں بحق

اسی وقت حیدرآباد کے یکہ پورہ ریلوے اسٹیشن کے قریب مشرقی چندر نگر میں کل رات تقریباً 11 بجے ایک دو منزلہ عمارت میں آگ لگنے سے شوہر اور بیوی کی موت ہوگئی اور ایک اور لڑکی زخمی ہوگئی۔ عمارت کی پہلی منزل پر آگ بھڑک اٹھی، جہاں پیسٹری بنائی جا رہی تھی۔ اس کے بعد آگ قریب ہی فروخت کے لیے رکھے پٹاخوں اور روئی کے ڈبوں میں پھیل گئی۔ اس حادثہ میں اشارانی (50) اور اس کے شوہر موہن لال (58) کی موت ہوگئی اور 18 سالہ شروتی زخمی ہوگئی۔ شروتی کو عثمانیہ جنرل اسپتال میں داخل کرایا گیا تھا۔