Delhi Mayor Election: دہلی میں آج میئر کا انتخاب، کس کے سر ہوگا تاج، آپ کی شیلی اوبرائے یا بی جے پی کی ریکھا گپتا ؟

Delhi Mayor Election: آج دہلی کے سیوک سینٹر میں واقع ایم سی ڈی ہاؤس میں ایم سی ڈی میئر، ڈپٹی میئر اور اسٹینڈنگ کمیٹی کے اراکین کا انتخاب  ہورہاہے۔بی جے پی لیڈر وجیندر گپتا  کے ایم سی ڈی ہاؤس میں اندر جانے پر عام آدمی پارٹی کے ورکروں نے مخالفت کی ۔ عام  آدمی پارٹی کی پولیس سے اس معاملے کو لے کر جم کر نوک جھونک بھی ہوئی ۔ ایم سی ڈی ہاؤس کی پچھلی تین میٹنگوں میں ایلڈرمین کے حق رائے دہی پر ہنگامہ آرائی کی وجہ سے الیکشن نہیں ہو سکا۔

قابل ذکر بات یہ ہے کہ عام آدمی پارٹی اور بی جے پی کے درمیان جاری رسہ کشی کی وجہ سے ایم سی ڈی ہاؤس کی میٹنگ جو تین بار بلائی گئی تھی، ملتوی کر دی گئی ہے۔ اس کے بعد AAP کی میئر امیدوار شیلی اوبرائے نے سپریم کورٹ سے الیکشن کرانے کی اپیل کی۔

عام آدمی پارٹی (اے اے پی) کی شیلی اوبرائے اور بھارتیہ جنتا پارٹی (بی جے پی) کی ریکھا گپتا نے دہلی میئر کے انتخابات کے لیے کاغذات نامزدگی داخل کیے ہیں۔ جبکہ AAP کے آشو ٹھاکر نے بھی اپنے کاغذات داخل کیے ہیں، لیکن انہیں صرف ڈمی امیدوار بنایا گیا ہے۔

ایم سی ڈی میئر، ڈپٹی میئر اسٹینڈنگ کمیٹی کے ارکان کا انتخاب آج 

انہوں نے ایلڈرمین کے ووٹنگ کے حقوق کو بھی چیلنج کیا۔ اس میں سپریم کورٹ نے اپنا فیصلہ سناتے ہوئے واضح کیا کہ ایلڈرمین کو ووٹ ڈالنے کا حق نہیں ہے اس لیے وہ میئر کے انتخاب کے عمل سے دور رہیں گے۔ آج ایم سی ڈی میئر، ڈپٹی میئر اسٹینڈنگ کمیٹی ممبران کا انتخاب ہے۔

آپ کو بتاتے چلیں کہ دہلی میں میونسپل کارپوریشن کے انتخابات 4 دسمبر کو ہوئے تھے اور نتائج 7 دسمبر کو آئے تھے، جس میں عام آدمی پارٹی نے 250 میں سے سب سے زیادہ 134 سیٹوں پر کامیابی حاصل کی تھی۔ اس کے بعد بھی دو ماہ سے زائد کا عرصہ گزر جانے کے باوجود میئر کا انتخاب نہیں ہوسکا۔ ایم سی ڈی ہاؤس میں ہوئی تین میٹنگوں میں آپ اور بی جے پی کے کونسلروں کے درمیان ہنگامہ آرائی کی وجہ سے دہلی کو ابھی تک نیا میئر نہیں مل سکا ہے۔ آج دہلی کو نیا میئر ملے گا۔