Uniform Civil Code: اتراکھنڈ کی اسمبلی میں یو سی سی بل پیش، پڑھیے بل کی خاص باتیں

Uniform Civil Code: یو سی سی کا بل اتراکھنڈن کے اسمبلی میں پیش کردیا گیا ہے ۔ جیسے سی سی ایم پشکر سنگھ دھامی نے اس بل کو اسمبلی میں ٹیبل کیا ،ویسے ہی اپوزیشن کی جانب سے نعرے بازی شروع ہوگئی البتہ اس ہنگامے کے بیچ ہی اس بل کو ٹیبل کردیا گیا ہے اور اراکین اسمبلی کو اس بل کی کاپی دے دی گئی ہے تاکہ وہ اس بل کا جائزہ لے سکیں اور اس کی کمیوں اور خامیوں پر بحث کرسکیں ۔ اس بیچ سی ایم پشکر سنگھ  اسمبلی میں اس بل کے قراردار اور تجاویز کو پیش کررہے ہیں ۔

یکساں سول کوڈ (یو سی سی) پر بل لانے کے لیے اتراکھنڈ قانون ساز اسمبلی کا خصوصی اجلاس پیر کو شروع ہوا ہے اور یو سی سی بل آج سیشن کے دوسرے دن یعنی منگل کو پیش کیا جائے گا۔ قانون کے نفاذ کے بعد، اتراکھنڈ آزادی کے بعد یو سی سی کو نافذ کرنے والی ملک کی پہلی ریاست ہوگی۔ یو سی سی گوا میں پرتگالی حکمرانی کے دنوں سے نافذ ہے۔ یو سی سی کے تحت، شادی، طلاق، نفقہ، زمین، جائیداد اور وراثت سے متعلق یکساں قوانین ریاست کے تمام شہریوں پر لاگو ہوں گے، چاہے ان کا مذہب کوئی بھی ہو۔

منگل کو ایوان میں پیش کیے جانے کے بعد اس بل پر بحث کی جائے گی۔ وزیر اعلیٰ پشکر سنگھ دھامی نے دیگر جماعتوں کے ایم ایل اے سے بحث میں حصہ لینے کی درخواست کی ہے۔ وزیر اعلیٰ پشکر سنگھ دھامی نے کہا کہ مادر طاقت کی ترقی کے لیے، ریاست کے اندر رہنے والے ہر فرقے، ہر برادری، ہر مذہب کے لوگوں کے لیے مثبت انداز میں بحث میں حصہ لیں۔

سیشن کے آغاز سے پہلے وزیر اعلیٰ پشکر سنگھ دھامی نے کہا کہ یو سی سی تمام طبقوں کے لیے اچھا رہے گا اور اس کے لیے پریشان ہونے کی ضرورت نہیں ہے۔ انہوں نے دیگر سیاسی جماعتوں کے ارکان سے بھی درخواست کی کہ وہ ایوان میں اس بل پر مثبت انداز میں بحث کریں۔ ریاستی کابینہ نے اتوار کو یو سی سی کے مسودے کو قبول کیا اور اسے 6 فروری کو ایک بل کے طور پر ایوان میں پیش کرنے کی منظوری دی۔ چار جلدوں میں 740 صفحات پر مشتمل یہ مسودہ سپریم کورٹ کے ریٹائرڈ جج رنجنا پرکاش دیسائی کی سربراہی میں پانچ رکنی کمیٹی نے جمعہ کو وزیر اعلیٰ کو پیش کیا تھا۔

سال 2022 میں ہونے والے اسمبلی انتخابات کے دوران بی جے پی نے عوام سے جو بڑے وعدے کیے تھے ان میں سے ایک یو سی سی پر ایکٹ بنانا اور اسے ریاست میں نافذ کرنا تھا۔ سال 2000 میں وجود میں آنے والی ریاست اتراکھنڈ میں مسلسل دوسری بار جیت درج کرکے تاریخ رقم کرنے کے بعد، بی جے پی نے مارچ 2022 میں حکومت کی تشکیل کے فوراً بعد کابینہ کی پہلی میٹنگ میں ہی یو سی سی کا  مسودہ تیار کرنے کے لیے ماہرین کمیٹی کی تشکیل کو منظوری دی تھی۔

یہ بھی پڑھیں- Uniform Civil Code: یکساں سول کوڈ کے نفاذ سے سماج پر کیا اثرات ہونگے مرتب ’جانئے تفصیلات  

دوسری جانب ریاست کے ڈائریکٹر جنرل آف پولیس ابھینو کمار نے کہا کہ پوری ریاست میں پولیس فورس کو چوکس رہنے کے احکامات دیے گئے ہیں تاکہ کسی بھی ممکنہ ناخوشگوار صورتحال سے نمٹا جاسکے۔

-بھارت ایکسپریس