CJI BR Gavai: ’’ہندوستان کے استحکام، اتحاد اور طاقت کی بنیاد ہے آئین‘‘، چیف جسٹس آف انڈیا نے کہا-ملک کے ہر شہری کو انصاف دلانا ہماری ذمہ داری

چیف جسٹس آف انڈیا جسٹس بی آر گوئی نے ہفتہ کے روز کہا کہ آئین ہی ملک کے استحکام، اتحاد اور طاقت کی بنیاد ہے۔ جسٹس گوئی الہ آباد ہائی کورٹ میں وکلاء کے لیے 2500 چیمبروں اور کثیر سطحی پارکنگ کی سہولت والے ایک کثیر المنزلہ کمپلیکس ہاؤسنگ کے افتتاح کے موقع پر ایک تقریب سے خطاب کر رہے تھے۔ انھوں نے کہا کہ ’’آج ہم دیکھتے ہیں کہ ہمارے پڑوسی ممالک کی کیا حالت ہے۔ ہندوستان آزادی کے بعد ترقی کی طرف سفر کر رہا ہے۔ جب بھی ملک میں کوئی بحران آیا ہے، ہندوستان متحد اور مضبوط رہا ہے۔ اس کا کریڈٹ آئین کو دینا چاہیے۔‘‘

سی جے آئی نے مزید کہا کہ ڈاکٹر بی آر امبیڈکر کے ذریعہ تیار کردہ آئین نے ہندوستان کی ترقی کے سفر میں اہم کردار ادا کیا ہے۔ آئین کے 75 سالہ سفر پر روشنی ڈالتے ہوئے جسٹس گوئی نے نوٹ کیا کہ مقننہ، ایگزیکٹو اور عدلیہ نے سماجی اور اقتصادی مساوات کے حصول میں نمایاں کردار ادا کیا ہے۔ وہیں انتہائی پسماندہ افراد کے لیے بھی انصاف کی فراہمی کو یقینی بنانے کی ضرورت پر زور دیتے ہوئے انھوں نے کہا ’’یہ ہمارا بنیادی فرض ہے کہ ہم اس آخری شہری تک بھی پہنچیں جسے انصاف کی ضرورت ہے۔ مقننہ ہو، ایگزیکٹو ہو یا عدلیہ، ہر کسی کو اس شہری تک پہنچنا چاہیے۔‘‘

بنیادی حقوق اور ہدایتی اصولوں، دونوں ہی آئین کی روح ہیں: سی جے آئی

زمینی اصلاحات کے دور کا ذکر کرتے ہوئے جسٹس گوئی نے یاد کیا کہ کس طرح ایسے قوانین لائے گئے جن کے تحت زمینداروں سے زمین لی گئی اور بے زمین افراد کو دی گئی۔ ان قوانین کو وقتاً فوقتاً چیلنج کیا گیا۔ 1973 سے پہلے سپریم کورٹ کا موقف تھا کہ اگر ہدایتی اصولوں اور بنیادی حقوق میں ٹکراؤ ہو گا تو بنیادی حقوق غالب ہوں گے۔ انھوں نے مزید کہا کہ ’’1973 میں 13 ججوں کا فیصلہ آیا کہ پارلیمنٹ کو آئین میں ترمیم کا حق ہے اور اس کے لیے وہ بنیادی حقوق میں ترمیم کر سکتی ہے لیکن اسے آئین کے بنیادی ڈھانچے کو تبدیل کرنے کا حق نہیں ہے‘‘۔ چیف جسٹس آف انڈیا نے مزید کہا کہ 13 ججوں کی بنچ نے واضح کیا ہے کہ بنیادی حقوق اور ہدایتی اصول دونوں ہی آئین کی روح ہیں۔ ’’یہ دونوں آئین کے سنہری رتھ کے دو پہیے ہیں، اگر آپ ان میں سے ایک پہیے کو روکیں گے تو پورا رتھ رک جائے گا۔‘‘

بار اور بنچ کے درمیان تال میل کی اہمیت کو اجاگر کرتے ہوئے CJI نے کہا کہ وہ ’’ایک ہی سکے کے دو رخ‘‘ ہیں۔ انھوں نے کہا کہ جب تک بار اور بنچ مل کر کام نہیں کریں گے انصاف کا رتھ آگے نہیں بڑھ سکتا۔ انھوں نے پورے ملک کے لیے ایک مثال قائم کرنے کے لیے الہ آباد ہائی کورٹ کی تعریف کی، یہ بتاتے ہوئے کہ کس طرح ججوں نے وکلاء کے لیے نئے کمپلیکس کی تعمیر میں سہولت فراہم کرنے کی خاطر 12 بنگلے خالی کیے تھے۔

الہ آباد ہائی کورٹ نے پورے ملک کے لیے پیش کیا رول ماڈل

انھوں نے کہا ’’آج الہ آباد ہائی کورٹ نے پورے ملک کے لیے ایک اچھا رول ماڈل پیش کیا ہے جس میں ججوں نے بار (کمپلیکس کی تعمیر کے لیے) کے لیے 12 بنگلے خالی کیے اور اپنے وکیل بھائیوں کی سہولت کا خیال رکھا۔‘‘ اس تقریب میں مرکزی وزیر قانون ارجن رام میگھوال، سپریم کورٹ کے ججز، الہ آباد ہائی کورٹ کے چیف جسٹس، اتر پردیش کے وزیر اعلی یوگی آدتیہ ناتھ اور ریاست کے سینئر بیوروکریٹس سمیت اعلیٰ قانونی شخصیات نے شرکت کی۔

بھارت ایکسپریس اردو