Delhi: سولہ سالہ طالبہ کی عصمت دری کے مجرم استاد کو دس سال قید، سزا میں نرمی کی درخواست مسترد

دہلی کی ایک عدالت نے ایک کوچنگ ٹیچر کو 16 سالہ نابالغ طالبہ کے ساتھ جنسی زیادتی کے جرم میں 10 سال قید کی سزا سنائی ہے۔ یہ معاملہ سال 2016 کا ہے، جب طالبہ ٹیوشن کے لیے کوچنگ سینٹر گئی تھی۔ ایڈیشنل سیشن جج انو اگروال نے ٹیچر کو آئی پی سی کی مختلف دفعات کے تحت قصوروار ٹھہراتے ہوئے POCSO ایکٹ کی دفعہ 6 کے تحت سزا سنائی۔

متاثرہ کی گواہی پر کیا عدالت نے اعتبار

عدالت نے ملزم کی اس دلیل کو مسترد کر دیا کہ کیس میں کوئی سائنسی یا طبی ثبوت موجود نہیں ہے۔ جج نے کہا کہ اگر متاثرہ کی گواہی مضبوط اور قابل اعتماد ہے تو اضافی ثبوت کی ضرورت نہیں ہے۔ عدالت نے یہ بھی کہا کہ جرح کے دوران بھی لڑکی کی گواہی کمزور نہیں ہوئی جس سے اس کی سچائی ثابت ہوتی ہے۔

میں نے خوف کی وجہ سے شکایت نہیں کی، پھر بھی انصاف ہوا: متاثرہ

2016 میں جرم کے فوراً بعد طالبہ نے کسی کو نہیں بتایا تھا، کیوں کہ ملزم نے اسے دھمکیاں دی تھیں۔ عدالت نے تسلیم کیا کہ لڑکی خوف کی وجہ سے خاموش رہی۔ سرکاری وکیل ارون کے وی نے دلیل دی کہ ملزم نے استاد ہونے کے ناطے سماج اور متاثرہ خاندان کا اعتماد توڑا ہے۔ متاثرہ لڑکی کے وکیل نے عدالت سے سخت سزا کا مطالبہ کرتے ہوئے کہا کہ طالبہ ذہنی صدمے سے گزر چکی ہے اور آج بھی خود کو مجرم سمجھتی ہے۔

ملزم کی سزا میں نرمی کی اپیل خارج کر دی گئی

ملزم نے یہ کہتے ہوئے وہ اپنے خاندان کا واحد کفیل ہے، سزا میں نرمی کی درخواست کی، لیکن عدالت نے اس کی اس درخواست کو مسترد کر دیا۔ عدالت نے کہا کہ اتنا سنگین جرم کسی قسم کی ہمدردی کا مستحق نہیں ہے۔

متاثرہ کو 10.5 لاکھ روپے معاوضہ

ملزم کو 10 سال قید بامشقت کے ساتھ دھمکیاں دینے کے جرم میں ایک سال کی اضافی سزا بھی سنائی گئی، تاہم دونوں سزائیں ایک ساتھ چلیں گی۔ عدالت نے متاثرہ کو 10.5 لاکھ روپے ہرجانہ دینے کا بھی حکم دیا ہے۔

تحقیقات میں تاخیر پر عدالت کا سخت تبصرہ

اس معاملے میں عدالت نے ایک اور POCSO کیس کے بارے میں دہلی پولیس کے تفتیشی عمل پر سخت تبصرہ کیا ہے۔ ایک الگ کیس میں چھ سال بعد چارج شیٹ داخل کرنے کے معاملے میں جج انو اگروال نے متعلقہ پولیس افسران کے خلاف تحقیقات کا حکم دیا ہے۔ عدالت نے کہا کہ بہت سے سنگین معاملات میں پولیس کے تفتیشی افسران چارج شیٹ کو سالوں تک اپنے پاس رکھتے ہیں جس سے متاثرین کو انصاف ملنے میں تاخیر ہوتی ہے۔

بھارت ایکسپریس اردو