انٹرٹینمنٹ

How Kartik Aryan became Bollywood’s ‘Rom-Com King’: نہ کوئی فلمی پس منظر، نہ گاڈ فادر، پھر بھی بالی ووڈ کے ’روم کام کنگ‘ بنے کارتک آرین، جدوجہد سے شہرت تک کا سفر

نئی دہلی، 21 نومبر: بالی ووڈ میں قدم رکھنا شاید آسان ہو، لیکن فلمی دنیا میں اپنی الگ پہچان بنانا اتنا آسان نہیں ہوتا۔ خاص طور پر اس وقت جب کسی کے پاس نہ تو فلمی خاندان کا پس منظر ہو اور نہ ہی کوئی گاڈ فادر۔ اداکار کارتک آرین کی کہانی بھی کچھ ایسی ہی جدوجہد سے بھری ہوئی ہے۔ انجینئرنگ کی تعلیم کے دوران اداکار بننے کا خواب دیکھنے والے کارتک نے کئی سال تک آڈیشن دیے، ناکامیوں کا سامنا کیا اور مالی پریشانیوں سے بھی گزرے، لیکن انہوں نے ہمت نہیں ہاری۔ آج وہ اپنی بہترین مزاحیہ اداکاری، رومانوی انداز اور شاندار اداکاری کی بدولت لاکھوں لوگوں کے دلوں پر راج کر رہے ہیں۔ انہیں بالی ووڈ کا ’روم کام کنگ‘ بھی کہا جاتا ہے۔

گوالیار میں پیدا ہوئے کارتک آرین

کارتک آرین کی پیدائش 22 نومبر 1990 کو مدھیہ پردیش کے گوالیار میں ہوئی تھی۔ ان کا اصل نام کارتک تیواری ہے۔ ان کے والد منیش تیواری بچوں کے ڈاکٹر ہیں، جبکہ والدہ مالا تیواری ماہر امراض نسواں ہیں۔ ان کے خاندان میں تعلیم اور ڈاکٹر بننے کو خاص اہمیت دی جاتی تھی، لیکن کارتک کے خواب کچھ مختلف تھے۔ وہ بچپن ہی سے فلموں میں کام کرنا چاہتے تھے۔انہوں نے ممبئی کی ڈی وائی پاٹل یونیورسٹی سے بایو ٹیکنالوجی انجینئرنگ کی تعلیم شروع کی، لیکن ان کی توجہ ہمیشہ فلمی دنیا میں کیریئر بنانے پر رہتی تھی۔ وہ اکثر کالج کی کلاس چھوڑ کر آڈیشن دینے چلے جاتے تھے۔ دلچسپ بات یہ ہے کہ انہوں نے ابتدا میں اپنے والدین کو بھی اپنے اداکار بننے کے خواب کے بارے میں نہیں بتایا تھا۔

تین سال کی جدوجہد کے بعد ملی پہلی فلم

کارتک کے لیے بالی ووڈ میں جگہ بنانا آسان نہیں تھا۔ تقریباً تین سال تک وہ مسلسل آڈیشن دیتے رہے، لیکن انہیں کامیابی نہیں ملی۔ بالآخر 2011 میں ان کی محنت رنگ لائی اور ہدایت کار لو رنجن کی فلم ’پیار کا پنچ نامہ‘ میں کام کرنے کا موقع ملا۔ اس فلم میں ان کا تقریباً پانچ منٹ طویل مکالمہ کافی مشہور ہوا۔ ناظرین کو ان کا انداز بے حد پسند آیا اور اسی فلم سے کارتک نے فلمی دنیا میں اپنی شناخت بنانی شروع کردی۔

’سونُو کے ٹیٹو کی سویٹی‘ سے ملی بڑی کامیابی

’پیار کا پنچ نامہ‘ کے بعد کارتک نے ’آکاش وانی‘ اور ’کانچی‘ جیسی فلموں میں کام کیا، لیکن انہیں خاص کامیابی نہیں ملی۔ 2015 میں ’پیار کا پنچ نامہ 2‘ نے انہیں ایک بار پھر سرخیوں میں لا کھڑا کیا۔ اس کے بعد 2018 میں ریلیز ہونے والی فلم ’سونُو کے ٹیٹو کی سویٹی‘ ان کے کیریئر کی بڑی ہٹ ثابت ہوئی۔ فلم نے باکس آفس پر شاندار کمائی کی اور کارتک نوجوانوں میں کافی مقبول ہوگئے۔اس کے بعد انہوں نے ’لوکا چھپی‘، ’پتی پتنی اور وہ‘ اور ’لو آج کل‘ جیسی فلموں میں اپنے رومانوی اور مزاحیہ انداز سے ناظرین کو متاثر کیا۔

’بھول بھلیاں 2‘ سے مقبولیت کو ملی نئی بلندی

2022 میں ریلیز ہونے والی فلم ’بھول بھلیاں 2‘ میں روح بابا کے کردار نے کارتک آرین کی مقبولیت کو نئی بلندیوں پر پہنچا دیا۔ اس کے بعد ’بھول بھلیاں 3‘ نے بھی باکس آفس پر شاندار کارکردگی کا مظاہرہ کیا۔ وہیں 2024 میں ریلیز ہونے والی فلم ’چندو چیمپئن‘ میں انہوں نے پیرا لمپک طلائی تمغہ جیتنے والے مرلی کانت پیٹکر کا کردار ادا کیا۔ اس کردار کے لیے کارتک نے سخت محنت کی اور اپنی جسمانی ساخت میں بھی بڑی تبدیلی کی۔ اس فلم کے لیے انہیں بہترین اداکار کا قومی فلم ایوارڈ اور فلم فیئر ایوارڈ ملا۔اس کے بعد 2025 میں کارتک آرین فلم ’تو میری میں تیرا، میں تیرا تو میری‘ میں بھی نظر آئے۔ ایک عام خاندان سے تعلق رکھنے والے کارتک کا سفر اس بات کی مثال ہے کہ فلمی پس منظر نہ ہونے کے باوجود مسلسل محنت اور لگن کے ذریعے فلمی دنیا میں اپنی شناخت بنائی جاسکتی ہے۔

بھارت ایکسپریس اردو۔

Abul Kalam

Recent Posts

Pinarayi Vijayan Criticizes Rahul Gandhi: فلسطین کی حمایت یا اسرائیل سے دوستی؟، فلسطین پر کانگریس کا دوہرا موقف بے نقاب، راہل گاندھی پر پنارائی وجین کا بڑا حملہ

شکاگو یونیورسٹی میں راہل گاندھی نے اسرائیل کے ساتھ ہندوستان کے اسٹریٹجک تعلقات کا دفاع…

1 hour ago