شردھا قتل کیس: آفتاب کا ہوگا میڈیکل چیک اپ ، آج ہو سکتا ہے نارکو ٹیسٹ

نئی دہلی، 21 نومبر (بھارت ایکسپریس): دہلی پولیس پیر کو شردھا قتل کیس کے ملزم آفتاب امین پونا والا کو نارکو ٹیسٹ سے قبل کچھ ضروری پری ٹیسٹ کے لیے اسپتال لے جائے گی۔ آفتاب کی پانچ روزہ پولیس حراست منگل کو ختم ہو رہی ہے۔ دہلی پولیس روہنی کے ڈاکٹر بی آر۔ امبیڈکر ہسپتال میں آفتاب کا ٹیسٹ کروانے کی تیاری کر رہی  ہے۔

ذرائع کے مطابق پولیس نے اس کا نارکو ٹیسٹ کرانے کے لیے باضابطہ طور پر روہنی ایف ایس ایل سے رابطہ کیا ہے، لیکن ابھی تک اس بات کی تصدیق نہیں ہوسکی ہے کہ یہ پیر کو کیا جائے گا یا نہیں۔ دریں اثنا، تفتیش کاروں کو آفتاب کے فون کو اسکین کرتے ہوئے کئی منشیات فروشوں کے نمبر ملے ہیں۔

ذرائع نے بتایا کہ شبہ ہے کہ وہ گانجہ اور چرس کا عادی تھا۔ اس کے فون پر ممبئی اور دہلی کے منشیات فروشوں کے رابطہ نمبر ملے ہیں، جن کی جانچ کی جا رہی ہے۔ اس کے علاوہ پولیس ٹیمیں ہماچل پردیش کے توش بھیجی گئی ہیں، کیونکہ تفتیش کے دوران پتہ چلا  ہےکہ وہ اپنے لیو ان  ساتھی کے ساتھ کافی عرصے سے وہاں مقیم تھا۔

آفتاب نے 18 مئی کو اپنی ساتھی شردھا واکر کا گلا دبا کر قتل کر دیا تھا اور اس کی لاش کے 35 ٹکڑے کر دیے تھے۔ پولیس نے کہا کہ کرائم ٹیم اور فارنسک ماہرین نے چھتر پور میں اس کے  کرائے کے مکان کا قریب سے معائنہ کیا ہے۔ گھر سے کئی چیزوں کو ضبط کیا گیا  ہے۔

آفتاب کے انکشاف کے بعد، کئی جگہوں پر کئی سرچ آپریشن کیے گئے ہیں، جن میں کچھ جنگلاتی علاقے بھی شامل ہیں، جہاں سے کئی ہڈیاں قبضے میں لی گئی ہیں۔ یہ معلوم کرنے کے لیے کہ ہڈیاں شردھا کی ہیں یا نہیں، ڈی این اے ٹیسٹ کے لیے اس کے والد اور بھائی کے خون کے نمونے لیے گئے ہیں۔ ڈی این اے ٹیسٹ کی رپورٹ آنے میں 15 دن لگیں گے۔