Parliament Winter Session 2025: پارلیمنٹ کا سرمائی اجلاس غیرمعینہ مدت کے لئے ملتوی، حکمراں اوراپوزیشن پارٹیوں کی ایک ساتھ چائے پارٹی، وزیراعظم مودی اورپرینکا گاندھی ایک ساتھ بیٹھے

نئی دہلی: پارلیمنٹ کا سرمائی اجلاس ختم ہوتے ہی ایک ایسی تصویرسامنے آئی ہے، جس نے سیاسی گلیاروں میں ہلچل تیزکردی ہے۔ تصویرمیں واضح طورپردیکھا جاسکتا ہے کہ کس طرح برسراقتدارپارٹی کے لیڈران اوراپوزیشن دونوں ساتھ بیٹھ کرچائے کی چسکی لے رہے ہیں۔ پارلیمنٹ میں کئی موضوعات پرہوئے ہنگامے کے بعد دونوں کی کیمسٹری کچھ اورہی کہہ رہی ہے۔

حکمراں اوراپوزیشن جماعتوں نے ایک ساتھ چائے کا لطف اٹھایا

پارلیمنٹ کے سرمائی اجلاس کے غیرمعینہ مدت کے لیے ملتوی ہونے کے بعد، اوم برلا کے کمرے سے ایک تصویرسامنے آئی، جس میں وزیراعظم نریندرمودی، وزیردفاع راج ناتھ سنگھ اور پرینکا گاندھی ایک ساتھ چائے کا لطف اٹھا رہے ہیں۔ میٹنگ کے دوران سماج وادی پارٹی کے رکن پارلیمنٹ دھرمیندریادواوراین سی پی شرد پوارگروپ کی ایم پی سپریا سولے سمیت کئی دیگر اراکین پارلیمنٹ موجود تھے۔ دراصل، اوم برلا نے راہل گاندھی کے مانسون سیشن کے بعد اسی طرح کی میٹنگ بلائی تھی، جس میں انہوں نے شرکت کرنے سے صاف انکارکردیا تھا۔ قیاس آرائیاں کی جا رہی ہیں کہ پرینکا گاندھی نے اپنے بھائی کی غلطی کوسدھارنے کے لیے میٹنگ میں شرکت کی ہو گی۔

گڈکری نے پرینکا گاندھی کو کھلایا کھانا

لوک سبھا میں پرینکا گاندھی نے مرکزی وزیرنتن گڈکری سے ناراضگی ظاہرکرتے ہوئے کہا تھا کہ ان کے پاس ملنے کا وقت نہیں ہے، جس پرنتن گڈکری نے کہا تھا کہ ان کے دروازے ہمیشہ پرینکا گاندھی کے لئے کھلے ہیں۔ گڈکری نے انہیں دن کا اجلاس ختم ہونے کے بعد ملنے کے لئے دفتر بلایا، جہاں انہوں نے پرینکا گاندھی کو کھانا بھی کھلایا۔

وزیراعظم مودی نے مزاحیہ انداز میں دیا جواب

ہلکے پھلکے انداز میں یہ بھی کہا گیا کہ سیشن مختصراس لئے رہا کیونکہ اپوزیشن مسلسل احتجاج کررہا تھا۔ وزیراعظم مودی نے مزاحیہ طورپرکہا کہ وہ ان کی آوازوں پرزورنہیں ڈالنا چاہتے تھے۔ وزیراعظم مودی نے این کے پریم چندرن جیسے رکن کے تعاون کی بھی ستائش کی اورکہا کہ وہ بحث کے لئے ہمیشہ پوری تیاری کے ساتھ آتے ہیں۔ اس ملاقات میں پرینکا گاندھی کے پارلیمانی حلقہ وائناڈ پربھی تبادلہ خیال کیا۔ اس دوران پرینکا گاندھی کی کسی بات پروزیراعظم مودی ہنستے ہوئے نظرآئے۔