Rahul Gandhi donates a month’s salary to aid relief in Wayanad: راہل گاندھی نے وایناڈ کے سیلاب متاثرین کی امداد کیلئے اپنی ایک ماہ کی تنخواہ عطیہ کردی

لوک سبھا میں قائد حزب اختلاف اور کانگریس کے رہنما راہل گاندھی نے بدھ کو اعلان کیا کہ انہوں نے سیلاب سے متاثرہ وایناڈ میں امداد اورراحت بحالی کی کوششوں میں مدد کے لیے ایک ماہ کی تنخواہ عطیہ کی ہے۔انہوں نے کہا کہ وایناڈ میں ہمارے بھائیوں اور بہنوں نے ایک تباہ کن سانحہ کا سامنا کیا ہے، اور انہیں ناقابل تصور نقصانات کا سامنا کرنے کے لیے ہمارے تعاون کی ضرورت ہے۔ میں نے اپنی پوری ماہ کی تنخواہ متاثرین کی امداد اور بحالی کی کوششوں میں عطیہ کی ہے۔ میں تمام ساتھی ہندوستانیوں سے خلوص دل سے درخواست کرتا ہوں کہ وہ جو کچھ بھی کر سکتے ہیں اپنا حصہ ڈالیں ۔واضح رہے کہ راہل گاندھی نے اپنے ایک ماہ کی مکمل تنخواہ دو لاکھ 30 ہزار کا عطیہ کیا ہے۔

وایناڈ جولائی میں موسلادھار بارشوں کی زد میں آ گیا تھا جس کی وجہ سے پہاڑی  علاقے ڈھل گئے تھے،جس سے بڑی تباہی ہوئی اور اس آفت کے نتیجے میں تقریباً 276 افراد ہلاک اور 240 لاپتہ ہو گئے۔راحت اور بچاؤ کے کاموں میں مدد کرنے کے علاوہ، وزیر اعظم نریندر مودی نے فوری ردعمل ظاہر کرتے ہوئے مرنے والوں کے لواحقین کے لیے 2 لاکھ روپے اور زخمیوں کے لیے 50،000 روپے کی امداد کا اعلان کیا۔ مزید برآں، تمل ناڈو کے وزیر اعلی ایم کے اسٹالن نے کیرالہ کو اپنی ریاست کی حمایت کا یقین دلایا، ایک ریسکیو ٹیم اور 5 کروڑ روپے کی امداد روانہ کی۔

اسی دوران راہل گاندھی اپنی بہن اور پارٹی لیڈر پرینکا گاندھی کے ساتھ حالات کا جائزہ لینے کے لیے وایناڈ پہنچے اور وہاں نامہ نگاروں سے بات کرتے ہوئے کہا، “اب سیاست کا وقت نہیں ہے۔ اس مشکل وقت میں پورا ملک وایناڈ کے ساتھ کھڑا ہے۔ ہمیں لوگوں کی مدد کے لیے درکار تمام مدد فراہم کرنے کے لیے متحد ہو کر کام کرنا چاہیے۔انہوں نے یہ بھی زور دیا تھا کہ ہماری فوری توجہ بچاؤ، راحت اور بحالی کی کوششوں پر ہے۔ کانگریس خاندان یہاں 100 سے زیادہ مکانات بنانے کے لیے پرعزم ہے۔ ہم اس بات کو یقینی بنانے کے لیے وقف ہیں کہ اس مشکل وقت میں ہمارے بھائیوں اور بہنوں کو ہر ممکن مدد فراہم کی جائے۔