Lok Sabha Election : کانگریس کی موثر حکمت عملی ! راہل گاندھی امیٹھی کے بجائے اس سیٹ سے لڑ سکتے ہیں انتخاب

کانگریس نے ابھی تک یوپی کی امیٹھی اور رائے بریلی سیٹوں  سے اپنے امیدواروں کے ناموں کا اعلان نہیں کیا ہے ،دونوں حلقہ گاندھی خاندان کا گڑھ رہا ہے ۔ اس دوران یہ خبر بھی سامنے آئی ہے کہ  کانگریس لیڈر راہل گاندھی امیٹھی کے بجائے رائے بریلی سے انتخاب لڑ سکتے ہیں۔

اس کے ساتھ ہی کانگریس امیٹھی سے بی جے پی امیدوار اور مرکزی وزیر اسمرتی ایرانی کے خلاف کے ایل شرما کو میدان میں اتار سکتی ہے۔ پارٹی یوپی کی دونوں سیٹوں کے لیے جمعرات (2 مئی 2024) کو  امیدواروں کا اعلان کر سکتی ہے۔

پرینکا گاندھی کہاں سے الیکشن لڑیں گی؟

ذرائع نے بتایا کہ راہل گاندھی نے کانگریس کے سابق صدر اور اپنی والدہ سونیا گاندھی کے مشورہ پر اپنے فیصلے پر نظر ثانی کی ہے۔ اس سے  یہ واضح ہو گیا ہے کہ کانگریس جنرل سکریٹری پرینکا گاندھی رائے بریلی سے لوک سبھا الیکشن نہیں لڑیں گی۔ تاہم اب تک سیاسی حلقوں میں یہ قیاس آرائیاں کی جا رہی تھیں کہ سونیا گاندھی کی فعال سیاست سے سبکدوشی کے بعد کانگریس رائے بریلی سے پرینکا گاندھی کو ٹکٹ دے سکتی ہے۔

یہ فیصلہ حیران کن ہے، کیونکہ راہل گاندھی 2004 سے 2019 تک امیٹھی سے ایم پی رہ چکے ہیں۔ انہوں نے 2019 کے لوک سبھا انتخابات میں کیرالہ کی امیٹھی اور وایناڈ سیٹوں سے مقابلہ کیا، لیکن امیٹھی میں مرکزی وزیر اسمرتی ایرانی سے الیکشن ہار گئے۔ اس بار بھی راہل گاندھی وایناڈ سیٹ سے الیکشن لڑے ہیں۔

دراصل، سماج وادی پارٹی، جو اپوزیشن اتحاد ‘انڈیا’ کا حصہ ہے، اتر پردیش میں کانگریس کے ساتھ مل کر الیکشن لڑ رہی ہے۔ اتحاد میں کانگریس کو اتر پردیش میں 80 میں سے 17 سیٹیں دی گئی ہیں۔

بھارت ایکسپریس۔