Dr. Bhim Rao Ambedkar’s Birth Anniversary: ڈاکٹر بھیم راؤ امبیڈکر کے یوم پیدائش پر پروفیسر انور پاشا اور کامریڈ منگت رام پاسلا نے دیا بڑا پیغام

ڈاکٹربھیم راؤامبیڈکرمشن سوسائٹی پنجاب (رجسٹرڈ) کی جانب سے امبیڈکربھون میں بابائے آئین ڈاکٹربھیم راؤامبیڈکرکے 135 ویں یوم پیدائش کے موقع پرایک عظیم الشان تقریب کا انعقاد کیا گیا۔ اس تقریب میں مہمان خصوصی کی حیثیت سے راشٹریہ جنتا دل (آرجے ڈی) کے قومی ترجمان اورجواہرلعل نہرویونیورسٹی (جے این یو) کے سابق پروفیسرسید انورعالم پاشا نے شرکت کی۔ جبکہ معروف سماجی مفکراورمزدورلیڈرکامریڈ منگت رام پاسلا مہمان خصوصی کے طورپرشامل تھے۔

ڈاکٹرامبیڈکرکے نقشِ قدم کی سرزمین سے عقیدت
اپنے خطاب میں پروفیسرانورپاشا نے اس تاریخی سرزمین سے اپنی وابستگی کا اظہارکرتے ہوئے کہا کہ وہ اس زمین کی اس لیے احترام کرتے ہیں کیونکہ یہاں گرونانک دیو، شہیدِ اعظم سردار بھگت سنگھ اورخود ڈاکٹرامبیڈکرنے قدم رکھا تھا۔ انہوں نے کہا کہ 1951 میں بابائے آئین کے پنجاب کے اس تاریخی دورے سے وابستہ امبیڈکربھون کی اس سرزمین کے لیے ان کے دل میں خصوصی احترام اوروابستگی ہے۔ انہوں نے یاد دلایا کہ 2017 میں بھی وہ امبیڈکرجینتی کے موقع پراس تاریخی مقام پرموجود تھے۔

امبیڈکرکا تصورکبھی پرانا نہیں ہو سکتا: پروفیسرانورپاشا

پروفیسرانورپاشا، جوآرجے ڈی کے قومی ترجمان ہونے کے ساتھ ساتھ ایک ممتازتعلیمی وادبی شخصیت ہیں، نے کہا کہ ڈاکٹرامبیڈکردنیا کے عظیم سماجی مفکر، ماہربشریات اورماہرِعمرانیات تھے۔ انہوں نے اپنی سوچ اورجدوجہد کے ذریعہ معاشرے کے ایک بڑے طبقے کو غلامی سے نجات دلائی۔ انہوں نے کہا کہ بابائے آئین مساوات، آزادی اوربھائی چارے کے عظیم عالمی مفکرین میں سے ایک تھے، جنہوں نے آئین کے ذریعے معاشرے کے ہرطبقے، مذہب اورذات کے افراد کو مساوی حقوق فراہم کئے۔ ڈاکٹرپاشا نے یقین دلایا کہ ڈاکٹرامبیڈکرکا تصورکبھی پرانا نہیں ہوسکتا، نہ ہی اس کا کبھی خاتمہ ہوسکتا ہے۔

ذات پرستی کے خاتمہ کے بغیرانقلاب نہیں آسکتا:کامریڈ پاسلا
تقریب کے مہمان خصوصی کامریڈ منگت رام پاسلا، جوبائیں بازوکی سیاست کی ایک اہم شخصیت ہیں، نے اپنے خطاب میں کہا کہ وہ کمیونسٹ نظریے پریقین رکھتے ہیں، لیکن ڈاکٹرامبیڈکر اوران کے افکارکے لیے ان کے دل میں بے پناہ عقیدت ہے۔ انہوں نے کہا کہ وہ اس بات پرپوری طرح یقین رکھتے ہیں کہ ہندوستان میں ذات پرستی کے خاتمے کے بغیرانقلاب کامیاب نہیں ہو سکتا۔ کامریڈ پاسلا نے مذہبی مرکزیت اورغیرسائنسی سوچ کوکمیونسٹوں، دلت طبقے، اقلیتوں اورخواتین کے خلاف ایک جنونی سوچ قراردیا۔ انہوں نے زوردے کرکہا کہ ملک کو بچانے کے لئے ڈاکٹرامبیڈکراورشہید بھگت سنگھ کے افکارکواپنانا ہوگا اورانہیں محض عقیدت کا مرکزنہیں بنایا جانا چاہئے۔ ان کا کہنا تھا کہ اگریہ نظریات اپنا لئے گئے توہی ملک کوبچایا جا سکتا ہے۔

شرکاء کے لیے نئے اقدامات کا اعلان
تقریب کے دوران امبیڈکرمشن سوسائٹی کی طرف سے ڈاکٹربی آرامبیڈکراسٹوڈنٹس گائیڈنس سیل اورویمن ونگ کے قیام کا بھی اعلان کیا گیا، جسے شرکاء نے خوب سراہا۔ تقریب کے آغاز سے قبل ستنام سنگھ بادھاون (آئی ایف ایس) کی قیادت میں مہمان خصوصی ڈاکٹرانورپاشا اورکامریڈ منگت رام پاسلا اوردیگررہنماؤں نے امبیڈکرمارگ پر 135 پودے لگا کراس تاریخی موقع کو منایا۔ اس کے بعد تتھاگت بدھ اوربابائے آئین ڈاکٹربھیم راؤامبیڈکرکے مجسمے پرگلہائے عقیدت پیش کئے گئے۔

حکومت سے اپنا حق مانگیں اورآگاہ رہیں: پروفیسربلبیر

تقریب سے خطاب کرتے ہوئے سوسائٹی کے صدرپروفیسربلبیرنے کہا کہ پنجاب میں اگرآپ 32 فیصد ہیں تواپنے حقوق سے آگاہ رہیں اورحکومت سے اپنا حق مانگیں، صرف دووقت کی روٹی تک محدود نہ رہیں۔ اس موقع پر پروفیسرڈاکٹرانورپاشا اورکامریڈ منگت رام پاسلا کے علاوہ ڈاکٹرراہل جسّی، سنی تھاپر، بلدیوراج بھاردواج، ڈاکٹرمہیندرسندھو، ڈاکٹرجی سی کول، پروفیسرایم آررانا، ایڈووکیٹ ہربھجن سمپلا اوردیگرکئی لیڈران اورعقیدت مندوں نے شرکت کی۔ سوسائٹی کے جنرل سکریٹری بلدیوراج بھاردواج نے یہ اطلاع دیتے ہوئے کہا کہ یہ تقریب تاریخی اعتبار سے اہم تھی، جس میں ایک عظیم مفکراورمزدوررہنما کے افکارکواجاگرکیا گیا۔

بھارت ایکسپریس اردو-