US Israel Iran conflict: وزیر اعظم مودی  نےیو اے ای حملے کی سخت مذمت کی، عام شہریوں اور انفراسٹرکچر کو نشانہ بنانا کسی بھی صورت میں قبول نہیں

نئی دہلی:  وزیر اعظم نریندر مودی نے متحدہ عرب امارات کی ایک بندرگاہ پر ہونے والے حالیہ حملے کی شدید مذمت کرتے ہوئے کہا ہے کہ عام شہریوں اور بنیادی ڈھانچے کو نشانہ بنانا کسی بھی صورت قابل قبول نہیں۔ اس حملے میں تین بھارتی شہریوں کے زخمی ہونے کی بھی تصدیق ہوئی ہے۔وزیر اعظم مودی نے اپنے بیان میں کہا کہ بھارت متحدہ عرب امارات کے ساتھ مضبوطی سے کھڑا ہے اور تمام تنازعات کے حل کے لیے بات چیت اور سفارتکاری کی حمایت کرتا ہے۔ انہوں نے اس بات پر زور دیا کہ آبنائے ہرمز میں محفوظ اور بلا رکاوٹ جہاز رانی نہ صرف خطے بلکہ عالمی توانائی کی سلامتی کے لیے بھی نہایت اہم ہے۔

دوسری جانب عالمی لیڈروں نے بھی اس حملے کی شدید مذمت کی ہے۔ انتونیو کوسٹا نے کہا کہ شہری تنصیبات پر میزائل اور ڈرون حملے بین الاقوامی قوانین کی سنگین خلاف ورزی ہیں اور انہیں فوری طور پر روکا جانا چاہیے۔ انہوں نے یو اے ای کی قیادت اور عوام کے ساتھ مکمل یکجہتی کا اظہار کیا۔جرمنی کے چانسلر فریڈرک مرزنے بھی حملے کو تشویشناک قرار دیتے ہوئے کہا کہ یو اے ای ایک بار پھر ڈرون اور میزائل حملوں کا نشانہ بنا ہے۔ انہوں نے زور دیا کہ ایران کو کشیدگی کم کرنے کے لیے مذاکرات کی میز پر واپس آنا چاہیے اور آبنائے ہرمز میں رکاوٹوں کو ختم کرنا ہوگا۔

کینیڈا کے وزیر اعظم مارک کارنی نے کہا کہ ان کا ملک یو اے ای پر بلا اشتعال حملوں کی سخت مذمت کرتا ہے اور شہریوں کے تحفظ کے لیے کیے گئے اقدامات کی تعریف کرتا ہے۔ انہوں نے خطے میں کشیدگی کم کرنے اور سفارتی حل کی ضرورت پر زور دیا۔اسی طرح برطانیہ کے وزیر اعظم کئیر اسٹارمر نے بھی ایران پر تنقید کرتے ہوئے کہا کہ خلیجی خطے میں امن کے لیے فوری اقدامات ضروری ہیں۔ انہوں نے کہا کہ ایران کو جنگ بندی برقرار رکھنے اور طویل مدتی سفارتی حل کے لیے سنجیدہ مذاکرات میں شامل ہونا چاہیے۔بین الاقوامی مبصرین کے مطابق اس حملے کے بعد مشرق وسطیٰ میں کشیدگی میں اضافہ ہوا ہے، جس کے عالمی تجارت اور توانائی کی سپلائی پر گہرے اثرات مرتب ہو سکتے ہیں۔ ایسے میں عالمی برادری کی جانب سے مشترکہ سفارتی کوششیں وقت کی اہم ضرورت بن گئی ہیں۔

بھارت ایکسپریس اردو