PM Modi Kashmir Visit : پانچ سال بعد سری نگرپہنچے پی ایم مودی،لوگوں نے بھارت ماتا کی جئے کے لگائے نعرے،6400 کروڑ روپے کی سوغات کے ساتھ پی ایم پہنچے ہیں کشمیر

جموں و کشمیر سے آرٹیکل 370 ہٹائے جانے کے بعد آج پہلی باروزیراعظم نریندر مودی  کشمیر کے سری نگر  پہنچے ہیں جہاں ایک بڑی ریلی ہونے جا رہی ہے۔ بی جے پی کا دعویٰ ہے کہ یہ کشمیر کی تاریخ کی اب تک کی سب سے بڑی ریلی ہوگی، جس میں 2 لاکھ سے زیادہ لوگ شرکت کریں گے۔ سری نگر کے بخشی اسٹیڈیم میں منعقد ہونے والے اس پروگرام کے پیش نظر سیکورٹی کے انتہائی سخت انتظامات کیے گئے ہیں۔ پی ایم مودی 7 کلو میٹر کا سفر طے کر کے آج بخشی اسٹیڈیم پہنچ رہے ہیں ۔ ان کی ریلی سے پہلے سری نگر کو ترنگوں اور بی جے پی کے جھنڈوں سے بھردیا گیا تھا۔ بخشی اسٹیڈیم کے باہر صبح سے ہی لوگوں کا ہجوم ہے۔ یہاں لوگ بھارت ماتا کی جئے کے نعرے لگا رہے ہیں۔سری نگر پہنچنے کے ساتھ ہی پی ایم مودی نے زراعت سے متعلق ایک نمائش کا دورہ کیا اور وہاں موجود نوجوانوں سے بات کی۔

بخشی اسٹیڈیم میں جلسہ عام سے خطاب کرتے ہوئے وزیر اعظم مودی 6400 کروڑ روپے کے کئی ترقیاتی پروجیکٹوں کی نقاب کشائی کریں گے۔ سیکورٹی کو مدنظر رکھتے ہوئے سری نگر کی چھوٹی سڑکوں کو بھی سیل کر دیا گیا ہے۔ سٹیڈیم کے باہر 24 گھنٹے پہلے ہی بیریکیڈنگ کر دی گئی ہے۔ کشمیر میں اتنا بڑا عوامی اجتماع حال ہی میں نہیں دیکھا گیا۔پی ایم مودی کے دورے کے پیش نظر سری نگر شہر میں ڈرون اور کواڈ کاپٹروں کی پرواز پر عارضی طور پر پابندی لگا دی گئی ہے۔پی ایم مودی سری نگر کے بخشی اسٹیڈیم میں ڈیولپ انڈیا ڈیولپ جموں و کشمیر پروگرام میں شرکت کریں گے اور مرکز کے زیر انتظام علاقے میں زرعی معیشت کو فروغ دینے کے لیے تقریباً 5,000 کروڑ روپے کی اسکیموں کا افتتاح کریں گے۔

ان اسکیموں میں “سودیش درشن” اور ‘پرشاد’ (پیلگریمیج ریجوینیشن اینڈ اسپرچوئل، ہیریٹیج اینہانسمنٹ ڈرائیو) اسکیموں کے تحت 1,400 کروڑ روپے سے زیادہ کی مالیت کے سیاحت کے شعبے سے متعلق ملک گیر پروجیکٹ شامل ہیں، جس میں مربوط ترقی کا ایک پروجیکٹ بھی شامل ہے۔ پی ایم مودی سرکاری ملازمین کو تقرری کے خطوط دیں گے۔ چیلنج بیسڈ ڈیسٹینیشن ڈیولپمنٹ (سی بی ڈی ڈی) اسکیم کے تحت منتخب سیاحتی مقامات کا اعلان کرنے کے علاوہ، وہ ‘دیکھو اپنا دیش عوام کے انتخاب کے سیاحتی مقام پول’ اور ‘چلو انڈیا گلوبل ڈائاسپورا’ کا بھی آغاز کریں گے۔ اس کے علاوہ، وزیر اعظم جموں و کشمیر میں تقریباً 1,000 نئے بھرتی ہونے والے سرکاری ملازمین کو تقرری خط تقسیم کریں گے اور مختلف مرکزی اسکیموں کے استفادہ کنندگان سے بھی بات چیت کریں گے، جن میں خواتین، کسانوں اور کاروباری افراد شامل ہیں۔

بھارت ایکسپریس۔