PM Modi Puducherry Roadshow: پڈوچیری میں وزیر اعظم مودی کا شاندار روڈ شو، پھولوں کی بارش اور ’’بھارت ماتا کی جے‘‘ کے نعروں سے گونج اٹھا شہر

پڈوچیری: وزیراعظم نریندر مودی نے پڈوچیری اسمبلی انتخابات کے پیش نظر جمعہ کو زبردست روڈ شو کیا، جس میں عوام کا غیر معمولی ہجوم دیکھنے کو ملا۔ سڑکوں کے دونوں جانب ہزاروں افراد جمع ہوئے اور ’’بھارت ماتا کی جے‘‘ اور ’’جے شری رام‘‘ کے نعروں سے پورا علاقہ گونج اٹھا۔ اس دوران وزیر اعظم پر جگہ جگہ پھولوں کی بارش کی گئی اور لوگوں نے ہاتھ ہلا کر ان کا خیر مقدم کیا۔ یہ روڈ شو پڈوچیری کے اہم علاقوں سے گزرا، جہاں مقامی شہریوں کے ساتھ ساتھ سیاحوں اور غیر ملکی شہریوں کا بھی جوش و خروش قابل دید تھا۔ کئی غیر ملکی شہریوں نے وزیر اعظم کے قافلے کی ویڈیوز اور تصاویر اپنے موبائل فونز میں محفوظ کیں۔ سڑکوں پر لوگوں کا ہجوم اتنا زیادہ تھا کہ سیکورٹی اہلکاروں کو بھی انتظامات برقرار رکھنے میں خاصی محنت کرنی پڑی۔

وزیر اعظم نریندر مودی نے روڈ شو کے دوران عوام سے اپیل کی کہ وہ آئندہ اسمبلی انتخابات میں بی جے پی اور اے آئی این آر سی اتحاد کو ووٹ دیں۔ اس موقع پر پڈوچیری کے وزیر اعلیٰ این رنگاسامی اور بی جے پی لیڈر و وزیر داخلہ اے نمسیوایم بھی ان کے ساتھ موجود تھے۔ روڈ شو اجنتا سگنل پوائنٹ سے شروع ہوا اور تقریباً دو کلومیٹر کا فاصلہ طے کرتے ہوئے کامراجر اسٹیچو اور راجا تھیٹر سگنل تک پہنچا۔ یہ روڈ شو تقریباً ایک گھنٹے تک جاری رہا۔ اس دوران مختلف مقامات پر لوگوں نے وزیر اعظم کا پھولوں سے استقبال کیا، جبکہ پارٹی کارکنان جھنڈے لہراتے رہے۔ مقامی دکانداروں اور شہریوں نے بھی گھروں کی بالکونیوں سے وزیر اعظم کا خیر مقدم کیا۔ ماحول میں جوش و خروش اور انتخابی سرگرمیوں کی گہما گہمی نمایاں رہی۔

روڈ شو کے بعد وزیر اعظم نریندر مودی چنئی روانہ ہوئے، جہاں وہ گنڈی کے ایک ہوٹل میں قیام کریں گے۔ اطلاعات کے مطابق وہ 4 اپریل کو بی جے پی لیڈروں کے ساتھ اہم میٹنگ کریں گے، جس میں انتخابی حکمت عملی اور اتحاد کے امور پر غور کیا جائے گا۔ وزیر اعظم کے دورے کے پیش نظر پڈوچیری اور چنئی میں سخت سیکورٹی انتظامات کیے گئے ہیں۔ چنئی میں قیام کے بعد وزیر اعظم 4 اپریل کو کیرالہ کا دورہ کریں گے۔ وہاں وہ تروولا میں عوامی جلسے سے خطاب کریں گے اور بعد ازاں ترواننت پورم میں روڈ شو کریں گے۔ اطلاعات کے مطابق وزیر اعظم دوپہر تین بجے کوٹایم ضلع کے چانگاناسری میں این ایس ایس کالج گراؤنڈ پہنچیں گے اور اس کے بعد سڑک کے ذریعے پتھانامتھٹا کے تروولا روانہ ہوں گے۔

اس کے بعد ترواننت پورم میں کِلی پالم جنکشن سے کرمنا تک تقریباً ڈیڑھ کلومیٹر طویل روڈ شو کیا جائے گا۔ اس میں بڑی تعداد میں پارٹی کارکنان اور حامیوں کی شرکت متوقع ہے۔ اس روڈ شو کے بعد وزیر اعظم اتحاد کے لیڈروں سے ملاقات کریں گے اور شام کو دہلی واپس روانہ ہوں گے۔ واضح رہے کہ کیرالہ میں اسمبلی انتخابات 9 اپریل کو ہونے والے ہیں۔ وزیر اعظم نریندر مودی کے مسلسل دورے اور روڈ شوز کو انتخابی مہم میں اہم پیش رفت کے طور پر دیکھا جا رہا ہے، جبکہ سیاسی حلقوں کا ماننا ہے کہ ان سرگرمیوں سے جنوبی بھارت میں انتخابی ماحول مزید گرم ہو گیا ہے۔

بھارت ایکسپریس اردو۔