PM Modi extends special greetings to Kutchi community on the occasion of Ashadhi Bij: آشاڈھی بیج کے موقع پر وزیرِ اعظم مودی نے کچھی برادری کو دی خصوصی مبارکباد

نئی دہلی: وزیرِ اعظم نریندر مودی نے آشاڈھی بیج کے مقدس موقع پر دنیا بھر میں مقیم کچھی برادری کو دل کی گہرائیوں سے مبارکباد پیش کی۔ سوشل میڈیا پلیٹ فارم ’ایکس‘ پر اپنے پیغام میں وزیرِ اعظم نے لکھا کہ ’’دنیا بھر میں بسنے والی کچھی برادری کو آشاڈھی بیج کے خاص موقع پر نیک خواہشات۔ دعا ہے کہ آنے والا سال سب کے لیے امن، خوش حالی اور بہترین صحت لے کر آئے۔‘‘

آشاڈھی بیج کی اہمیت

آشاڈھی بیج تہوار خاص طور پر گجرات کے ضلع کَچھ میں روایتی عقیدت و احترام کے ساتھ منایا جاتا ہے۔ اس موقع پر مانسون کے آغاز اور زرعی سال کے نئے دور کی شروعات کا جشن منایا جاتا ہے۔ کچھی برادری کے لیے یہ دن امید، خوش حالی اور استقامت کی علامت ہے۔ لوگ روایتی رسومات، لوک گیتوں اور ثقافتی تقریبات کے ذریعے دعا کرتے ہیں کہ بارش اچھی ہو اور کھیتیاں سرسبز رہیں۔

کچھی ثقافت کا عالمی رنگ

کچھی برادری اپنی تجارتی ذہانت، ثقافتی ورثے اور عالمی سطح پر موجودگی کے لیے جانی جاتی ہے۔ ضلع کَچھ مختلف نسلوں اور برادریوں کا گہوارہ ہے، جن میں کچھی پٹیل، لوہانا، میمن، جین، سندھی اور رباری شامل ہیں۔ ان سب نے اس خطے کے سماجی اور ثقافتی تانے بانے میں اہم کردار ادا کیا ہے۔ کَچھ اپنے روایتی دستکاری، خاص طور پر کڑھائی، شیشہ کاری، بندھنی کے لیے دنیا بھر میں شہرت رکھتا ہے۔ کچھی برادری نے نہ صرف بھارت بلکہ دنیا کے 40 سے زائد ممالک میں اپنی شناخت قائم کی ہے۔ مشرقی افریقہ، خاص طور پر کینیا اور یوگنڈا میں ان کا کردار انیسویں اور بیسویں صدی میں اقتصادی ترقی میں نمایاں رہا ہے۔

بھارت ایکسپریس اردو