PM Modi in Russia: روس کے اعلیٰ ترین شہری اعزاز ’آرڈر آف سینٹ اینڈریو دی اپوسل‘ سے نوازے گئے پی ایم مودی، وزیر اعظم نے کہا- ہندوستان کے 140 کروڑ عوام کیلئے ہے یہ اعزاز

ماسکو: روس کے صدر ولادیمیر پوتن نے منگل کے روز وزیر اعظم نریندر مودی کو روس کے اعلیٰ ترین شہری اعزاز ’آرڈر آف سینٹ اینڈریو دی اپوسل دی فرسٹ کالڈ‘ سے نوازا۔ یہ روس کا سب سے باوقار شہری اعزاز ہے۔ 2019 میں روس نے انہیں یہ اعزاز دینے کا اعلان کیا تھا۔ یہ ایوارڈ روس اور ہندوستان کے درمیان استحقاق یافتہ اسٹریٹجک شراکت داری کو فروغ دینے اور دونوں ممالک کے درمیان دوستانہ تعلقات کو فروغ دینے میں پی ایم مودی کی نمایاں شراکت کو تسلیم کرتا ہے۔ اس ایوارڈ کی اہمیت کا اندازہ اس بات سے لگایا جا سکتا ہے کہ یہ 326 سال پرانا ہے۔ 1698 میں، زار پیٹر دی گریٹ نے روس کے سرپرست سینٹ اینڈریو کے اعزاز میں ’آرڈر آف سینٹ اینڈریو دی اپوسل‘ کو شروع کیا تھا۔

وہیں، اس اعزاز سے نوازے جانے کے بعد وزیر اعظم مودی نے کہا کہ یہ ہندوستان کے 140 کروڑ عوام کے لیے ایک اعزاز ہے۔ انہوں نے کہا، ’’میں آپ (صدر پوتن) کا تہہ دل سے شکریہ ادا کرتا ہوں کہ انہوں نے مجھے روس کے سب سے بڑے (سویلین) ایوارڈ سے نوازا۔ یہ اعزاز صرف میرا نہیں، یہ 140 کروڑ ہندوستانیوں کا اعزاز ہے۔ ہندوستان اور روس کے درمیان صدیوں پرانی گہری دوستی اور باہمی اعتماد کا اعزاز یہ ہماری خصوصی اور استحقاق یافتہ اسٹریٹجک شراکت داری کا اعزاز ہے…گزشتہ 2.5 دہائیوں میں آپ کی قیادت میں ہندوستان اور روس کے تعلقات تمام سمتوں میں مضبوط ہوئے ہیں۔ اور ہر بار نئی بلندیوں کو چھوا ہے۔ دونوں ممالک کے درمیان اسٹریٹجک تعلقات کی جو بنیاد آپ نے رکھی تھی وہ وقت گزرنے کے ساتھ مزید مضبوط ہوئی ہے۔ عوام سے شراکت داری پر مبنی ہمارا باہمی تعاون ہمارے لوگوں کے بہتر مستقبل کی امید اور ضمانت بن رہا ہے۔‘‘

بتا دیں کہ ’آرڈر آف سینٹ اینڈریو دی اپوسل‘ کو اصل میں شاندار سول اور ملٹری میرٹ اور ملک کے لیے غیر معمولی خدمات کے اعتراف میں دیا گیا تھا۔ ایوارڈ کا نشان نیلے رنگ کی پٹی، سینٹ اینڈریو کی کراس والا ایک بیج، اور سینے پر پہنا ہوا ستارہ پر مشتمل ہے۔ یہ بیج سینٹ اینڈریو کی سنہری کراس ہے، جس میں X کے سائز کی صلیب پر عیسیٰ کی تصویر ہے۔ یہ ایوارڈ 1917 میں روسی انقلاب کے بعد ختم کر دیا گیا تھا لیکن سوویت یونین کے بعد کے دور میں اسے دوبارہ شروع کیا گیا۔