PM Modi and HM Amit Shah extend birthday greetings to Rajnath Singh: وزیر اعظم مودی اور وزیر داخلہ امت شاہ نے پیش کی وزیر دفاع راج ناتھ سنگھ کو ان کی سالگرہ پر مبارکباد

وزیر دفاع راج ناتھ سنگھ جمعرات کو اپنی 74ویں سالگرہ منا رہے ہیں۔ اس خاص موقع پر وزیر اعظم نریندر مودی نے انھیں سالگرہ کی مبارکباد دی۔ پی ایم مودی نے کہا کہ انھوں نے اپنی محنت اور دانش مندی سے اپنی شناخت بنائی ہے۔ پی ایم مودی نے دفاعی شعبے میں ہندوستان کو خود کفیل بنانے کے لیے وزیر دفاع کی کوششوں کی بھی تعریف کی۔

پی ایم مودی نے سوشل میڈیا پر کیا نیک خواہشات کا اظہار

وزیر اعظم مودی نے سوشل میڈیا پلیٹ فارم ’ایکس‘ پر لکھا کہ ’’وزیر دفاع راج ناتھ سنگھ کو سالگرہ مبارک ہو۔ وہ اپنی محنت اور ذہانت کے لیے مشہور ہیں۔ ہندوستان کو دفاعی شعبے میں خود انحصار بنانے اور ہماری افواج کو مضبوط بنانے میں ان کا تعاون قابل ستائش ہے۔ میں خدا سے ان کی لمبی اور صحت مند زندگی کی دعا کرتا ہوں۔‘‘

وزیر داخلہ امت شاہ نے بھی دی مبارکباد

مرکزی وزیر داخلہ امت شاہ نے بھی راج ناتھ سنگھ کو مبارکباد دی۔ انھوں نے کہا کہ ’’وزیر دفاع اور سینئر بی جے پی لیڈر راج ناتھ سنگھ کو سالگرہ کی دلی مبارکباد۔ پی ایم مودی کی قیادت میں آپ ملک کی فوجی طاقت کو مسلسل مضبوط کرنے اور دفاع کے میدان میں خود انحصاری کو فروغ دینے کے لیے قابل ستائش کام کر رہے ہیں۔ تنظیم سے لے کر حکومت تک، آپ نے کامیابی کے ساتھ تمام ذمہ داریاں نبھاکر سماجی زندگی گزارنے والوں کو تحریک دی ہے۔ آپ کی صحت مند اور لمبی زندگی کے لیے دعا کرتا ہوں۔‘‘

دریں اثنا اور بھی بی جے پی لیڈران نے راج ناتھ سنگھ کو مبارک باد دی ہے۔ اتر پردیش کے وزیر اعلی یوگی آدتیہ ناتھ نے لکھا کہ ’’ہندوستانی سیاست میں آدرشوں، پاکیزگی اور تحمل کے مظہر، بی جے پی خاندان کے سینئر رکن اور وزیر دفاع راج ناتھ سنگھ کو سالگرہ کی دلی مبارکباد۔ آپ کی پانچ دہائیوں سے زیادہ کی عوامی زندگی قومی پالیسی، قومی سلامتی اور اخلاقی سیاست کی روشن مثال ہے۔ بھگوان شری رام کی رحمتیں آپ پر قائم رہیں۔ آپ کو اچھی صحت اور لمبی زندگی نصیب ہو۔‘‘

راج ناتھ سنگھ کا سیاسی سفر

مرکزی وزیر نتن گڈکری نے بھی راج ناتھ سنگھ کو ان کی سالگرہ کی مبارکباد دی اور لکھا کہ ’مرکزی کابینہ میں میرے ساتھی وزیر دفاع راج ناتھ سنگھ کو سالگرہ کی دلی مبارکباد۔ میں خدا سے آپ کی اچھی صحت، لمبی عمر اور اچھی زندگی کی دعا کرتا ہوں۔‘‘ واضح رہے کہ راج ناتھ سنگھ کی پیدائش 1951 میں اتر پردیش کے گاؤں ببھورا (ضلع چندولی) میں ہوئی تھی۔ ان کا شمار ملک کے سینئر سیاستدانوں میں ہوتا ہے۔

انھوں نے 1974 میں سیاست کا آغاز کیا اور 1977 میں اتر پردیش قانون ساز اسمبلی میں ایم ایل اے منتخب ہوئے۔ نومبر 1999 میں وہ اٹل بہاری واجپئی حکومت میں مرکزی روڈ ٹرانسپورٹ وزیر تھے۔ وہ اکتوبر 2000 میں اتر پردیش کے وزیر اعلیٰ بنے ۔ پھر2003 میں وہ واجپئی حکومت میں وزیر زراعت بنے۔ وہ 2013 سے 2015 تک بی جے پی کے قومی صدر رہے۔2014 میں وہ نریندر مودی حکومت میں مرکزی وزیر داخلہ بنے اور 2019 میں انھیں ملک کا وزیر دفاع بنایا گیا۔ 2024 میں جب پی ایم مودی کی قیادت میں تیسری بار این ڈی اے کی حکومت بنی تو انھیں دوسری بار وزارت دفاع کی ذمہ داری دی گئی۔

بھارت ایکسپریس اردو