PM Meets AI Sector CEOs: وزیراعظم نریندر مودی کا اے آئی شعبے کے ماہرین اور سی ای اوز سے تبادلۂ خیال، خود کفیل بھارت کے وژن پر زور

نئی دہلی: وزیراعظم نریندر مودی نے جمعرات کو لوک کلیان مارگ میں واقع اپنی رہائش گاہ پر مصنوعی ذہانت (AI) کے شعبے سے وابستہ ممتاز سی ای اوز اور ماہرین کے ساتھ تفصیلی بات چیت کی۔ اس موقع پر انہوں نے بھارت کو اے آئی ٹیکنالوجی میں خود کفیل اور عالمی سطح پر قائد بنانے کے ہدف پر زور دیا۔ یہ ملاقات فروری میں ہونے والے انڈیا اے آئی امپیکٹ سمٹ کے پیش نظر منعقد کی گئی، جس کا مقصد اسٹریٹجک شراکت داری کو فروغ دینا، اے آئی اختراعات کو اجاگر کرنا اور بھارت کے اے آئی مشن کو تیز رفتار بنانا ہے۔ سی ای اوز نے اے آئی میں خود کفالت کے ہدف کی بھرپور حمایت کرتے ہوئے حکومت کی کوششوں کو سراہا اور بھارت کو عالمی سطح پر اے آئی کا مرکز بنانے کے عزم کا اظہار کیا۔

شفاف اور محفوظ اے آئی نظام پر زور

وزیراعظم نے کہا کہ ہمیں ایسا اے آئی ایکو سسٹم تیار کرنا ہوگا جو شفاف، غیر جانبدار اور محفوظ ہو۔ انہوں نے واضح کیا کہ اے آئی کے اخلاقی استعمال پر کسی بھی طرح کا سمجھوتہ نہیں ہونا چاہیے۔ ساتھ ہی انہوں نے ڈیٹا سکیورٹی، ٹیکنالوجی کی جمہوریت کاری اور اے آئی اسکلنگ پر بھی خصوصی توجہ دینے کی ضرورت پر زور دیا۔ پی ایم مودی نے کہا کہ یونیفائیڈ پیمنٹس انٹرفیس (UPI) کے ذریعے بھارت نے اپنی تکنیکی صلاحیتوں کا مظاہرہ کیا ہے اور یہی ماڈل اے آئی کے میدان میں بھی اپنایا جا سکتا ہے۔ انہوں نے کہا کہ ہمیں اپنی ٹیکنالوجی سے نہ صرف اثر پیدا کرنا ہے بلکہ دنیا کو متاثر بھی کرنا ہے۔ وزیر اعظم نے تمام شعبوں میں دیسی ٹیکنالوجی کے استعمال کی اپیل کرتے ہوئے کہا کہ اس سے ملک کی ترقی کو نئی رفتار ملے گی اور بھارت عالمی اے آئی ایکو سسٹم میں ایک مضبوط مقام حاصل کرے گا۔

سرکردہ کمپنیوں اور اداروں کی شرکت

اس اعلیٰ سطحی اجلاس میں وِپرو، ٹی سی ایس، ایچ سی ایل ٹیک، زوہو کارپوریشن، ایل ٹی آئی مائنڈٹری، جیو پلیٹ فارمز، اڈانی کونیکس، نیکسترا ڈیٹا اور نیٹ ویب ٹیکنالوجیز کے سی ای اوز کے علاوہ آئی آئی آئی ٹی حیدرآباد، آئی آئی ٹی مدراس اور آئی آئی ٹی بمبئی کے ماہرین نے شرکت کی۔ مرکزی وزیر برائے الیکٹرانکس و آئی ٹی اشونی ویشنو اور وزیر مملکت جتن پرساد بھی اس موقع پر موجود تھے۔ وزیر اعظم نے اس بات پر زور دیا کہ بھارت کا اے آئی ایکو سسٹم ملک کی اقدار، کردار اور جمہوری روح کی عکاسی کرے اور دنیا کے لیے ایک مثالی نمونہ بنے۔

بھارت ایکسپریس اردو۔