Batla House Demolition Case: بٹلہ ہاؤس میں ابھی نہیں چلے گا بلڈوزر! عدالت سے ملی بڑی راحت، اب تک 44 جائیدادوں کومل گیا اسٹے

نئی دہلی: دارالحکومت دہلی کے جامعہ نگرعلاقے میں بلڈوزر کارروائی سے متعلق بڑی راحت ملی ہے۔ بٹلہ ہاؤس کے مرادی روڈ بٹلہ ہاؤس علاقے کی 12 جائیدادوں سے متعلق معاملے کی سماعت آج ساکیت کورٹ میں ہوئی۔ سبھی معاملے میں سینئر وکیل کرنل سنگھ نے پیروی کی۔ عدالت نے ان سبھی 12 معاملوں میں 17 جولائی تک اسٹے آرڈر جاری کردیا ہے۔ یہ اطلاع اوکھلا سے عام آدمی پارٹی کے رکن اسمبلی امانت اللہ خان نے سوشل میڈیا پوسٹ کے ذریعہ دی ہے۔

آپ کو بتادیں کہ اس سے پہلے 32 دیگرجائیدادوں کوپہلے ہی راحت مل چکی ہے، جس سے اب تک کل 44 جائیدادوں پراسٹے مل چکا ہے۔ بچے ہوئے 7 معاملوں کی سماعت دہلی ہائی کورٹ میں ہونی ہے۔ واضح رہے کہ کل 52 جائیدادوں پر نوٹس جاری کئے گئے تھے۔ آج کی سماعت میں سبھی متعلقہ وکیل عدالت میں پیش ہوئے۔ اس مقدمے کو فائل کرنے والے وکیل شبیرعلی ہیں، جو شروع سے ہی معاملے میں سرگرم کردارادا کررہے ہیں۔ عدالت سے ملی بڑی راحت پرمقامی لوگوں نے اطمینان کا اظہارکیا ہے اورامید ظاہرکی ہے کہ بقیہ جائیدادوں کو بھی انصاف ملے گا۔

ایم ایل اے امانت اللہ خان نے پوسٹ سے دی جانکاری

امانت اللہ خان نے سوشل میڈیا پوسٹ پرلکھا ”آج الحمداللہ مرادی روڈ بٹلہ ہاؤس کی 12 جائیداد کا کیس ساکیت کورٹ میں لگا تھا، جن سبھی میں سینئروکیل کرنل سنگھ جی پیش ہوئے۔ سبھی 12 میس میں ساکیت کورٹ نے 17 جولائی تک اسٹے کردیا۔ ابھی تک 44 پراپرٹی پر اسٹے آچکا ہے، باقی بچے 7 کیس میں ہائی کورٹ میں سماعت ہونی ہے، کل پراپرٹی جن پرنوٹس لگا تھا، وہ 52 ہیں، اس میں سبھی وکیل بھی پیش ہوئے اور اس کیس کو فائل کرنے والے شبیرعلی ہیں۔“