PM Modi Pays Tribute To Netaji Subhas Chandra Bose:وزیراعظم مودی  نے پراکرم دیوس پر نیتا جی سبھاش چندر بوس کی جرأت اور حب الوطنی کو کیا یاد، پیش کیا خراج عقیدت

بھارت کے عظیم مجاہدآزادی اور ممتاز قومی لیڈر نیتا جی سبھاش چندر بوس کی جینتی کے موقع پر وزیرِ اعظم نریندر مودی نے انہیں عقیدت کے پھول نذر کیے۔ ہر سال 23 جنوری کو نیتا جی کی سالگرہ کو پرکرم دیوس کے طور پر منایا جاتا ہے، جس کا مقصد ان کی بے مثال جرأت، عزم اور وطن کے لیے قربانیوں کو یاد
کرنا ہے۔ اس موقع پر وزیراعظم نے سوشل میڈیا کے ذریعے قوم کے ساتھ اپنے جذبات کا اظہار کیا۔

وزیر اعظم مودی نے ایک ویڈیو پیغام شیئر کرتے ہوئے کہا کہ نیتا جی سبھاش چندر بوس کی جینتی، جو پرکرم دیوس کے طور پر منائی جاتی ہے، ہمیں ان کے ناقابلِ تسخیر حوصلے، مضبوط عزم اور ملک کے لیے ان کی بے نظیر خدمات کی یاد دلاتی ہے۔ انہوں نے کہا کہ نیتا جی نے بے خوف قیادت اور غیر متزلزل حب الوطنی کی مثال قائم کی، جو آج بھی ملک کے نوجوانوں اور آنے والی نسلوں کے لیے مشعلِ راہ ہے۔ وزیر اعظم کے مطابق نیتا جی سبھاش چندر بوس کے نظریات ایک مضبوط اور خود کفیل بھارت کی تعمیر کے لیے مسلسل تحریک فراہم کرتے ہیں۔

اپنے پیغام میں وزیراعظم مودی نے یہ بھی ذکر کیا کہ نیتا جی سبھاش چندر بوس نے ہمیشہ انہیں ذاتی طور پر متاثر اور متحرک کیا ہے۔ انہوں نے اپنے گجرات کے وزیر اعلیٰ کے دور کی چند یادگار تصاویر شیئر کرتے ہوئے بتایا کہ 23 جنوری 2009 کو ای گرام وشوگرام یوجنا کا آغاز کیا گیا تھا، جس کا مقصد گجرات کے آئی ٹی شعبے کو نئی سمت دینا تھا۔ یہ منفرد منصوبہ ہری پورہ سے شروع کیا گیا تھا، جس کا نیتا جی سبھاش چندر بوس کی زندگی میں خاص مقام رہا ہے۔

وزیر اعظم نے ہری پورہ کے عوام کے گرمجوش استقبال کو یاد کرتے ہوئے کہا کہ وہ اس لمحے کو کبھی نہیں بھول سکتے جب اسی سڑک پر جلوس نکالا گیا ،جس پر کبھی نیتا جی سبھاش چندر بوس چلے تھے۔ ان کے مطابق یہ تجربہ ان کے لیے فخر اور تحریک کا باعث تھا۔ پرکرم دیوس کے موقع پر وزیراعظم کے اس پیغام نے ایک بار پھر نیتا جی سبھاش چندر بوس کی جدوجہد، قربانی اور حب الوطنی کو قومی شعور میں تازہ کر دیا ہے۔

بھارت ایکسپریس اردو