Omar Abdullah on Delhi Blast : ”ہر کشمیری دہشت گرد نہیں ہے“، دہلی دھماکہ پر وزیراعلیٰ عمر عبداللہ کا بیان، کہا- بے گناہوں کو نہ گھسیٹا جائے

جموں و کشمیر کے وزیراعلیٰ عمر عبداللہ نے دہلی کے لال قلعے کے قریب ہونے والے حالیہ دہشت گردانہ حملے کی شدید مذمت کرتے ہوئے کہا ہے کہ چند مجرموں کی حرکتوں کی سزا پوری وادی کے عوام کو نہیں دی جا سکتی۔ ان کا کہنا تھا کہ ہر کشمیری کو دہشت گرد قرار دینا نہ صرف غیر منصفانہ ہے بلکہ یہ سوچ ملک کے اتحاد و امن کے لیے نقصان دہ ہے۔

جمعرات کو میڈیا سے گفتگو کرتے ہوئے عمر عبداللہ نے کہا کہ “اس واقعے کی جتنی مذمت کی جائے کم ہے۔ بے گناہ لوگوں کے قتل کی اجازت کوئی مذہب نہیں دیتا۔ مگر اس کے ساتھ ہمیں یہ بھی سمجھنا ہوگا کہ جموں و کشمیر کا ہر شہری دہشت گرد نہیں ہے، نہ ہی وہ دہشت گردوں کا حمایتی ہے“۔ انہوں نے واضح کیا کہ چند عناصر ایسے ہیں جو وادی میں امن و بھائی چارے کو نقصان پہنچانا چاہتے ہیں، مگر اکثریت امن پسند ہے۔ ان کے مطابق، “جب ہم ہر کشمیری مسلمان کو ایک ہی نظریے سے دیکھنے لگتے ہیں اور سمجھتے ہیں کہ سب دہشت گرد ہیں، تو پھر اصل مجرموں کو الگ کرنا مشکل ہو جاتا ہے“۔

دہلی کار بلاسٹ کے ملزمان کی پیشہ ورانہ پس منظر پر بات کرتے ہوئے وزیراعلیٰ نے کہا کہ تعلیم یافتہ افراد کا دہشت گردی میں ملوث ہونا باعث تشویش ہے۔ انہوں نے سوال اٹھایا کہ “ہم نے ماضی میں یونیورسٹی کے پروفیسروں کو بھی اس میں ملوث پایا۔ انہیں نوکری سے تو برطرف کیا گیا، لیکن ان کے خلاف مکمل تحقیقات یا مقدمہ کیوں نہیں چلایا گیا“؟

عمر عبداللہ نے زور دیا کہ دہلی دھماکے کے ذمہ داروں کو سخت ترین سزا دی جائے، تاہم بے گناہوں کو اس کی لپیٹ میں نہ لایا جائے۔ انہوں نے کہا کہ محض چند لوگ ایسے ہیں جو اس حملے میں شامل تھے اور ان کے جرم کی آڑ میں پورے خطے کو بدنام نہیں کیا جانا چاہیے۔ قابلِ ذکر ہے کہ دہلی کار بلاسٹ اور فریدآباد میں پکڑے گئے مشتبہ دہشت گردوں میں سے بیشتر کا تعلق جموں و کشمیر سے بتایا گیا ہے، جس کے بعد ریاست کے عام شہریوں پر شبہات بڑھ گئے ہیں۔ وزیراعلیٰ نے عوام اور میڈیا سے اپیل کی ہے کہ وہ صبر و تحمل سے کام لیں اور نفرت یا تعصب کی بنیاد پر کسی بے قصور کو نشانہ نہ بنائیں۔

بھارت ایکسپریس اردو