New Regulations of Indian Railways: ویٹنگ ٹکٹ والے مسافروں کو اب ریلوے اسٹیشن پر بھی نہیں ملے گی انٹری، حکومت نے لیا سخت فیصلہ

مرکزی وزیر ریلوے اشونی ویشنو نے پارلیمنٹ میں بتایا کہ ریلوے اسٹیشنوں پر بھیڑ کے انتظام کو بہتر بنانے کے لیے کئی اہم اقدامات کیے گئے ہیں۔ ان میں چوڑے فٹ اوور برجز، سی سی ٹی وی کی نگرانی اور وار روم کے انتظامات شامل ہیں۔تہواروں اور میلوں کے دوران بھاری بھیڑ کو کنٹرول کرنے کے لیے ریلوے نے محدود انٹری کنٹرول سسٹم نافذ کیا ہے۔ اس انتظام کے تحت اسٹیشنوں کے باہر ہولڈنگ ایریاز بنائے گئے ہیں جہاں پر ٹرین پلیٹ فارم پر آنے تک مسافروں کو داخلے کی اجازت نہیں ہوگی۔

ریلوے 60 اسٹیشنوں پر مستقل ہولڈنگ ایریاز بنائے گی

 وزیر ریلوے اشونی ویشنوکے مطابق 2024 کے تہوار کے سیزن کے دوران سورت، ادھنا، پٹنہ اور نئی دہلی میں ہولڈنگ ایریا بنائے گئے تھے۔ یہ نظام مہا کمبھ کے دوران پریاگ راج کے نو اسٹیشنوں پر بھی نافذ کیا گیا تھا۔ ان تجربات کی بنیاد پر ملک بھر کے 60 اسٹیشنوں پر مستقل ویٹنگ روم بنائی جائیں گی۔وہیں اب 60 اسٹیشنوں پر مکمل انٹری کنٹرول نافذ کیا جائے گا۔ یعنی صرف کنفرم ریزرو ٹکٹ والے مسافروں کو ہی پلیٹ فارم میں داخلے کی اجازت ہوگی، جبکہ ویٹنگ لسٹ اور بغیر ٹکٹ کے مسافروں کو باہر ویٹنگ ایریا میں رہنا ہوگا۔ غیر مجاز داخلی دروازے بھی سیل کر دیے جائیں گے۔

مزید سی سی ٹی وی کیمرے نصب کیے جائیں گے

 وزیر ریلوے نے کہا کہ نئے ڈیزائن کے 12 میٹر اور 6 میٹر چوڑے ایف او بی بنائے جائیں گے جو ہجوم کے انتظام میں مددگار ثابت ہوں گے۔ اس کے علاوہ تمام بڑے اسٹیشنوں پر نگرانی کے لیے سی سی ٹی وی کیمروں کی تعداد میں اضافہ کیا جائے گا۔ بڑے ریلوے سٹیشنوں پر وار روم بنائے جائیں گے جہاں بھیڑ بھاڑ کی صورت میں تمام محکموں کے اہلکار تال میل سے کام کریں گے۔ بہت زیادہ ہجوم والے اسٹیشنوں پر واکی ٹاکیز، اعلاناتی نظام اور ڈیجیٹل مواصلاتی آلات نصب کیے جائیں گے۔

ریلوے ملازمین کو نیا یونیفارم اور شناختی کارڈ ملے گا

 ریلوے ملازمین کو نئے یونیفارم اور شناختی کارڈ جاری کیے جائیں گے تاکہ صرف مجاز افراد ہی اسٹیشنوں میں داخل ہو سکیں۔ بڑے اسٹیشنوں پر اسٹیشن ڈائریکٹرز تعینات کئے جائیں گے جنہیں مالی اختیارات دیئے جائیں گے تاکہ وہ فوری فیصلے کر سکیں۔ا سٹیشن ڈائریکٹر کو اسٹیشن کی گنجائش اور دستیاب ٹرینوں کے مطابق ٹکٹوں کی فروخت کو کنٹرول کرنے کا اختیار دیا جائے گا۔ اسٹیشنوں پر سیکورٹی کو یقینی بنانے کے لیے جی آر پی، مقامی پولیس اور سول انتظامیہ بھی شامل ہوگی۔پلیٹ فارم ٹکٹ صرف خاص حالات میں دستیاب ہوں گے۔ نئی دہلی ریلوے اسٹیشن پر حالیہ بھگدڑ سے سبق لیتے ہوئے، ریلوے زونل افسران کو پلیٹ فارم ٹکٹوں کی فروخت کو کنٹرول کرنے کا اختیار دیا گیا ہے۔ تاہم، بزرگ، ناخواندہ اور خواتین مسافروں کی مدد کے لیے پلیٹ فارم ٹکٹ مخصوص خاص حالات میں جاری کیے جائیں گے۔

بھارت ایکسپریس۔