قومی

J&K Assembly Elections 2024: ’’اتحاد دو پارٹیوں میں ہے لیڈران کے درمیان نہیں…‘‘، جانئے نیشنل کانفرنس کے لیڈر شیخ بشیر نے کسے دی نصیحت

سری نگر: جموں و کشمیر اسمبلی انتخابات کے اعلان کے بعد وادی میں سیاسی سرگرمیاں تیز ہوگئی ہیں اور یہاں کے عام لوگوں میں کافی جوش و خروش ہے۔ دفعہ 370 کے خاتمے کے بعد یہاں پہلی بار انتخابات ہو رہے ہیں۔ ہر کوئی اپنی اپنی جیت کا دعویٰ کر رہا ہے۔ نیشنل کانفرنس کے لیڈر شیخ بشیر نے صحافیوں سے بات کرتے ہوئے کہا، ’’کانگریس اور نیشنل کانفرنس نے اتحاد کیا ہے۔ دونوں جماعتوں نے مل کر الیکشن لڑنے کا فیصلہ کیا ہے۔ اگرچہ اس قدم سے کسی کے مفادات کو نقصان نہیں پہنچے گا لیکن میں یہاں اس بات پر زور دینا چاہوں گا کہ یہاں کسی کے ذاتی مفاد کی اہمیت نہیں ہے۔ اگر ہمارے لیے کوئی چیز اہمیت رکھتی ہے تو وہ پارٹی ہے۔ ہاں، اس بات کو یکسر مسترد نہیں کیا جا سکتا کہ ایک شخص جو گزشتہ 10 سال سے پارٹی کے لیے کام کر رہا یو، لیکن اتحاد کے بعد اسے یہ کہہ دیا جائے کہ وہ الیکشن نہیں لڑے گا، تو اسے جھٹکا تو لگے گا ہی۔ لیکن میں یہاں اس بات پر زور دینا چاہوں گا کہ جو چیز اہم ہے وہ پارٹی ہے نہ کہ کسی فرد کا ذاتی مفاد۔ ہمارے لیے پارٹی سپریم رہی ہے اور آئندہ بھی رہے گی۔

انہوں نے مزید کہا، ’’موجودہ حالات کو مدنظر رکھتے ہوئے، آپ کو یہاں ایک بات سمجھنی ہوگی کہ جب کوئی بھی سیاسی جماعت اتحاد بنانے کا فیصلہ کرتی ہے تو اس میں بڑے عوامل کو مدنظر رکھا جاتا ہے۔ اس کے علاوہ آپ کو ایک اور بات کی طرف دھیان دینا ہوگا کہ اس وقت جموں و کشمیر ایک دو نہیں بلکہ کئی مسائل سے دوچار ہے۔ اس دوران انتخابات بھی ہونے جا رہے ہیں۔ ایسے میں ہمیں کئی چیزوں کا خاص خیال رکھنا پڑتا ہے۔ میں ایک بار پھر اپنے ساتھیوں سے کہنا چاہوں گا کہ یہ اتحاد ہو گیا ہے، اس لیے براہ کرم اسے ذاتی طور پر نہ لیں۔ ہم سب جانتے ہیں کہ یہ جمہوریت ہے اور کسی بھی جمہوری نظام کے تحت کوئی بھی پارٹی کسی کا ساتھ دے سکتی ہے۔

انہوں نے کہا، ’’ہاں… اس حقیقت کو یکسر مسترد کرنا درست نہیں ہے کہ اس وقت وادی میں سیاسی منظر نامے کے حوالے سے بہت سی بے ضابطگیاں ہیں، لیکن ہمیں ان سب کو نظر انداز کر کے ترقی پر توجہ مرکوز کرنا ہو گی، تب ہی ہم اپنے مقاصد حاصل کر سکتے ہیں۔ جب ہم اچھی طرح جانتے ہیں کہ کسی بھی جمہوری نظام میں حتمی طاقت عوام کے پاس ہوتی ہے۔ آپ اسے اس طرح سمجھ سکتے ہیں، فرض کریں کہ ایک الیکشن میں 20 امیدواروں کی فہرست ہے، لیکن عوام صرف ایک شخص کو جیتنے کا تاج پہنائے گی۔ یہ ممکن نہیں کہ سب جیت جائیں۔ یہ جمہوریت کی روایت ہے، جسے ہم سب قبول کرنے کے پابند ہیں۔

بھارت ایکسپریس۔

Md Hammad

Recent Posts

Bhajan Sandhya at World Peace Centre: گروگرام کے ورلڈ پیس سینٹر میں 21 نومبر کو ’بھجن کلبنگ‘ کا انعقاد، گورنر سدھا یادو کریں گی افتتاح

مرکزی وزیر گجیندر سنگھ شیخاوت اور آچاریہ لوکیش جی نے برطانیہ کے ہاؤس آف لارڈز…

2 hours ago

Women’s Asian Champions Trophy: ویمنز ایشین چیمپئنز ٹرافی، بھارت نے ملائیشیا کو 4-1 سے شکست دے کر کیا فاتحانہ آغاز، ڈیبیو میچ میں پوجا ساہو نے داغا گول

موجودہ چیمپئن بھارت نے ویمنز ایشین چیمپئنز ٹرافی 2026 میں شاندار آغاز کرتے ہوئے ملائیشیا…

3 hours ago