Parliamentary Committees: پارلیمنٹ سے متعلق کمیٹیوں کے چیئرپرسن کے ناموں کا اعلان، کے سی وینوگوپال بنے پی اے سی کے چیئرمین

Parliamentary Committees: لوک سبھا اسپیکر اوم برلا نے ایوان سے متعلق اہم کمیٹیوں کے چیئرمینوں کے ناموں کا اعلان کیا ہے۔ روایت کے مطابق کانگریس کے سینئر رکن پارلیمنٹ کے سی وینوگوپال کو پارلیمانی نظام کی سب سے اہم کمیٹی پبلک اکاؤنٹس کمیٹی (پی اے سی) کا چیئرمین مقرر کیا گیا ہے۔ اس کمیٹی کی مدت 30 اپریل 2025 کو ختم ہوگی۔ آپ کو بتاتے چلیں کہ پارلیمانی نظام میں پبلک اکاؤنٹس کمیٹی کو سب سے اہم اور بااثر کمیٹی سمجھا جاتا ہے۔

ان 22 ارکان پارلیمنٹ کو کمیٹی میں کیا گیا تھا شامل

اس کمیٹی میں لوک سبھا کے 15 ممبران پارلیمنٹ اور راجیہ سبھا کے 7 ممبران پارلیمنٹ شامل ہیں یعنی اسپیکر سمیت کل 22 ممبران پارلیمنٹ۔ کے سی وینوگوپال کے علاوہ ٹی آر بالو، نشی کانت دوبے، جگدمبیکا پال، جئے پرکاش، روی شنکر پرساد، سی ایم رمیش، مگنٹا شری نواسولو ریڈی، پروفیسر سوگت رائے، اپراجیتا سارنگی، ڈاکٹر امر سنگھ، تیجسوی سوریا، انوراگ سنگھ ٹھاکر، بالاشوری ولبھنینی اور دھرمیندر یادو کمیٹی کے ممبر ہیں۔ جبکہ راجیہ سبھا سے اشوک چوہان، شکتی سنگھ گوہل، ڈاکٹر کے لکشمن، پرفل پٹیل، سکھیندو شیکھر رائے، تروچی کے شیوا اور سدھانشو ترویدی سمیت دیگر، حکمراں پارٹی اور اپوزیشن کے ایم پی شامل ہیں۔

دیگر کمیٹیوں کے سربراہوں کا اعلان

دریں اثنا، بی جے پی ایم پی سنجے جیسوال تخمینہ کمیٹی کی صدارت کریں گے۔ بئیجینت پانڈا حکومتی اقدامات سے متعلق کمیٹی کی صدارت کریں گے۔ پبلک اکاؤنٹس کمیٹی، پبلک انڈرٹیکنگز کی کمیٹی (COPU) اور تخمینہ کمیٹی پارلیمنٹ کی اہم مالیاتی کمیٹیاں ہیں، جنہیں حکومت کے کھاتوں اور عوامی اداروں کے کام کاج پر نظر رکھنے کا کام سونپا گیا ہے۔

یہ بھی پڑھیں- Udaipur Violence: اب یہ چیزیں اسکول نہیں لے جا سکیں گے طالب علم، ادے پور واقعہ کے بعد بھجن لال حکومت کا بڑا فیصلہ

ساتھ ہی بی جے پی کے رکن پارلیمنٹ گنیش سنگھ کو دیگر پسماندہ طبقات کی بہبود کے لیے بنائی گئی کمیٹی کا چیئرمین بنایا گیا ہے۔ پبلک انڈر ٹیکنگ کمیٹی کی صدارت بی جے پی ایم پی بئیجینت پانڈا کو سونپی گئی ہے۔ بی جے پی ایم پی فگن سنگھ کلستے کو درج فہرست ذات اور درج فہرست قبائل کمیٹی کا چیئرمین بنایا گیا ہے۔

-بھارت ایکسپریس