Manish Sisodia Bail Rejected: شراب پالیسی معاملے میں منیش سسودیا کو عدالت سے جھٹکا، عدالت نے ضمانت عرضی خارج کی

Delhi Excise Policy Case: دہلی شراب پالیسی معاملے میں گرفتار دہلی کے سابق نائب وزیراعلیٰ منیش سسودیا کو عدالت سے جھٹکا لگا ہے۔ عدالت نے جمعہ کے روز سی بی آئی کی طرف سے درج معاملے میں ان کی ضمانت عرضی خارج کردی۔ نچلی عدالت کے فیصلے کے خلاف منیش سسودیا دہلی ہائی کورٹ میں اپیل کریں گے۔

دہلی کی نئی شراب پالیسی کی بدعنوانی کے الزامات میں سی بی آئی نے منیش سسودیا کو لمبی پوچھ گچھ کے بعد 26 فروری کو گرفتار کیا تھا۔ اس کے بعد انفورسمنٹ ڈائریکٹوریٹ (ای ڈی) نے ان سے تہاڑ جیل میں لمبی پوچھ گچھ کی تھی۔ اس پوچھ گچھ کے بعد ای ڈی نے انہیں گرفتار کرلیا تھا۔ اس معاملے میں بھی منیش سسودیا نے عدالت میں ضمانت عرضی داخل کی تھی۔

اسپیشل جج ایم کے ناگپال نے 24 مارچ کو ضمانت عرضی پر فیصلہ محفوظ رکھ لیا تھا۔ جمعہ کے روزجج نے حکم پڑھتے وقت صرف ایک لفظ بولا ڈسمس (خارج)۔ فیصلے کی وجہ کے لئے عدالت کے تحریری حکم کا انتظار کرنا ہوگا۔ منیش سسودیا نے گرفتاری کے بعد دہلی کے وزیرعہدے سے استعفیٰ دے دیا تھا۔ ان کی جگہ دہلی میں آتشی مارلینا کو وزیرتعلیم بنایا گیا ہے۔