Madhya Pradesh Loksabha Elections and Congress: کانگریس میں بغاوت شروع، مدھیہ پردیش میں کمل ناتھ ، دگ وجئے سنگھ اور جیتو پٹواری کے خلاف کاروائی کا مطالبہ

کانگریس پارٹی نے مدھیہ پردیش میں ہونے والے لوک سبھا انتخابات میں تمام سیٹیں کھو دی ہیں۔ بی جے پی نے مدھیہ پردیش میں تمام 29 لوک سبھا سیٹیں جیت لی ہیں۔ اس کے بعد کانگریس کے اندر بغاوت تیز ہوگئی ہے۔ کانگریس لیڈر اور اپوزیشن کے سابق لیڈر اجے سنگھ نے سابق وزیر اعلیٰ کمل ناتھ، دگ وجئے سنگھ اور ریاستی صدر جیتو پٹواری کو شکست کا ذمہ دار ٹھہرایا ہے۔اجے سنگھ نے کہا کہ میں ریاستی صدر جیتو پٹواری کی میعاد پر نظرثانی کا مطالبہ کرتا ہوں کیونکہ ان کی قیادت میں بڑی تعداد میں لیڈروں اور کارکنوں نے پارٹی چھوڑ دی ہے۔

اجے سنگھ نے کہا کہ جب بڑے لیڈر ہماری پارٹی چھوڑ رہے تھے تو اس پر بحث ہونی چاہئے کہ انہیں روکنے کے لئے کیا اقدامات کئے گئے۔ انہوں نے کہا کہ شکست کی وجوہات تلاش کی جائیں۔ اجے سنگھ نے کہا کہ پارٹی کارکنان مدھیہ پردیش میں بڑی شکست سے مایوس ہیں۔ اس کے علاوہ اجے سنگھ نے سابق وزرائے اعلیٰ کمل ناتھ اور دگ وجے سنگھ کو بھی نشانہ بنایا۔ انہوں نے کہا کہ قیادت کو یہ بھی معلوم کرنا چاہیے کہ یہ دونوں رہنما اپنے آبائی علاقوں سے کیوں نہیں نکلے اور انہوں نے انتخابات میں کس کے لیے مہم چلائی۔ اجے سنگھ نے کہا کہ سابق مرکزی وزیر سریش پچوری اور ایم ایل اے رام نیواس راوت جیسے لیڈروں نے پارٹی چھوڑ دی۔ انہوں نے یہ بھی کہا کہ جب خود غرض رہنما بحران کے وقت پارٹی چھوڑ چکے ہیں تو انہیں کبھی واپس نہیں لینا چاہیے۔

آپ کو بتادیں کہ اجے سنگھ مدھیہ پردیش کے سابق وزیر اعلیٰ اور مرکزی وزیر مرحوم ارجن سنگھ کے بیٹے ہیں۔ ارجن سنگھ کانگریس پارٹی کا ایک بڑا چہرہ ہوا کرتے تھے۔ اپنی مثال دیتے ہوئے اجے سنگھ نے کہا کہ جب میں 2013 میں اپوزیشن لیڈر تھا اور کانگریس پارٹی کو عبرتناک شکست کا سامنا کرنا پڑا تھا تو میں نے استعفیٰ دے دیا تھا۔ انہوں نے کہا کہ کسی کو ذمہ داری لینی ہوگی کیونکہ آج تک اتنی بری شکست کبھی نہیں ہوئی۔

بھارت ایکسپریس۔